برطانوی ہوائی اڈے پرلوگوں کو عریاں دیکھنے کے لئے جدید اسکینر کی تنصیب
نئے اسکینر سے تمام جسمانی خدوخال کونمایاں کرکے دیکھا جاسکتا ہے
برطانیہ کے مانچسٹر ائیرپورٹ کے حکام نے مسافروں کو ان کے تمام جسمانی خدوخال سمیت جدید''عریاں اسکینر'' کے ذریعے دیکھنے کے متنازعہ فیصلے کا دفاع کیا ہے.اس اسکینر کے ذریعے نازک حصوں سمیت لوگوں کے تمام جسمانی اعضاء کو لباس سمیت دیکھا جاسکتا ہے.
میڈیا کی رپورٹس کے مطابق برطانیہ کے چوتھے مصروف ترین ائیرپورٹ پر اس جدید اسکینرکومسافروں کی تلاشی کے لئے استعمال کیا جارہا ہے اور اسے تجربے کے طور پر آئندہ بارہ ماہ تک استعمال کیا جائے گا.اس کا مقصد دھماکا خیز مواد یا ہتھیار لے کر جانے والے کسی بھی فرد کو ائیرپورٹ کی حساس حدود میں داخل ہونے سے روکنا ہے.
ائیرپورٹ کے حکام کا کہنا ہے کہ جدید اسکینروں کی تنصیب سے سکیورٹی جانچ کے عمل کو تیزبنانے میں مدد ملے گی لیکن یہ عمل ان لوگوں میں تشویش کا سبب بن سکتا ہے جو اپناآپ کسی اور پرظاہر نہیں کرنا چاہتے.
یہ نیا اسکینر اتنا جدید ہے کہ یہ نازک حصوں سمیت تمام اعضاء کو نمایاں کرکے دکھا سکتا ہے لیکن ائیرپورٹ کے ایک عہدے دار کا کہنا ہے کہ مسافروں کو اس سے خوفزدہ ہونے کی ضرورت نہیں کیونکہ اسکینر پر جس شخص کو دیکھا جاسکے گا وہ سرچ ایریا میں بیٹھا ہوا نہیں ہوگا اور وہ اسکین کئے گئے امیج کو کسی ایک فرد سے لنک بھی نہیں کریں گے.
مانچسٹر ائیرپورٹ کی کسٹمر ریلیشنز کی ایک عہدے دار سارہ بیریٹ نے برطانوی اخبارات کو بتایا ہے کہ ''اسکین کئے گئے امیج کوائیرپورٹ کی کسی دورجگہ پر بیٹھا ہوا ایک اعلیٰ تربیت یافتہ سکیورٹی افسر ہی دیکھتا ہے''.
اس جدید اسکینر کا ایک مثبت پہلو یہ ہے کہ اس سے مسافروں کو دوسروں کے سامنے اپنے جوتے،بیلٹ یا دوسرے کپڑے نہیں اتارنا پڑیں گےحالانکہ اس وقت بیشتر بین الاقوامی ائیرپورٹس پر مسافروں کواس توہین آمیزعمل سے گزرنا پڑتا ہے.
مانچسٹر ائیرپورٹ کی ترجمان بیریٹ کا کہنا ہے کہ ''یہ ٹیکنالوجی ایک کامیاب متبادل ثابت ہوئی ہے لیکن ہم یہ بات بھی جانتے ہیں کچھ لوگ اسے متنازعہ ہونے کی نظر سے دیکھ رہے ہیں اس لئے اسے آزمائشی بنیاد پر چلایا جارہا ہے''.
برطانوی پریس نے اس اسکینر کو''عریاں اسکینر''کا نام دیا ہے.اسے سب سے پہلے لندن کے ہیتھروائیرپورٹ پر نصب کیا گیا تھا لیکن اس وقت مسافرحضرات اپنی اسکین کی گئی صاف شفاف تصویروں کو دیکھ کر ہکا بکا رہ گئے تھے جس کے بعدحکام نے اس اسکینر کو ہٹا دیا تھا.
میڈیا اطلاعات کے مطابق اگر مانچسٹر ائیرپورٹ پر اسکینر کی تنصیب کا تجربہ کامیاب رہتا ہے تو اس کے بعد برطانیہ کے تمام ائیرپورٹس پر اس کو نصب کیا جاسکتا ہے.سکائی نیوزکی رپورٹ کے مطابق امریکا کے متعدد ائیرپورٹس نے بھی ایک ہزار اسکینرزخرید کئے ہیں جنہیں نصب کیاجارہا ہے.
Bookmarks