Dhoop ke saath gayaa saath nibhaaney waalaa
Ab kahaa'n aaegaa wo laut ke aaney waalaa
Ret par chhor gayaa naqsh hazaaro'n apaney
Kisi paagal ki tarah naqsh mitaaney waalaa
Sab'z shaaKhein kabhi aise to nahin cheeKhiti hain
Kaun aayaa hai parindoun ko daraaney waalaa
Aariz-e-shaam ki surKhi ne kiyaa faash usey
Pardaa-e-ab'r mein thaa aag lagaaney waalaa
Safar-e-shab kaa taqaazaa hai merey saath raho
Dasht pur_haul hai toofaan hai aaney waalaa
Mujh ko dar_pardaa sunaataa rahaa qissaa apna
Agaley waqtoun ki hikaayaat sunaaney waalaa
Shabanami ghaas ghaney phool larazati kiranein
Kaun aayaa hai Khazaanou'n ko lutaaney waalaa
Ab to aaraam karein sochiti aa'nkhen meri
Raat kaa aaKhiri taaraa bhi hai jaaney waalaa...**
*~*~*~*~*~<<<<<>>>>>~*~*~*~*~*
Bookmarks