میں پاکستانی کوکنگ کی دنیا میں انقلاب لائی ہوں: لیکن میرا کھانا میرے میاں بناتے ہیں۔ شیف راحت
“میرا کھانا میرے میاں بناتے ہیں، قدرتی ا سٹائل پر پابندیاں لگائی جائیں تو تخلیقی صلاحیتوں پر برااثر پڑتا ہے، ابلی سبزی اور ابلے چاول شوق سے کھاتی ہوں“
ان خیالات کااظہار جیو ٹی وی کے کوکنگ شو”فوڈ ایوننگ ود راحت“ کی میزبان شیف راحت نے جیو ٹی وی کے پروگرام ”نادیہ خان شو“ میں کیا۔
اپنے بدلتے ہوئے انداز کے بارے میں راحت نے بتایا کہ میں پہلے جس چینل پر کام کرتی تھی وہاں مجھے یہ کہا گیا کہ سیدھی کھڑی رہیں، زیادہ حرکت نہیں کرنی ہے، میں پابندیوں میں کام نہیں کرسکتی، میرا اپنا منفرد انداز ہے، اگر قدرتی اسٹائل پر پابندیاں لگائی جائیں تو تخلیقی صلاحیتوں پر برااثر پڑتا ہے۔ کوکنگ کی دنیا میں آمد کے بارے میں راحت نے بتایا کہ مجھے بچپن سے ہی کوکنگ کا بہت شوق تھا، ٹی وی پر لانے والی میری بیٹی مائدہ تھی، مائدہ نے ٹی وی پر ایک کوکنگ شو دیکھا جو اسے پسند نہیں آیا اس نے مجھ سے کہا کہ آپ کوکنگ جانتی ہیں، آپ کو ٹی وی پر جانا چاہئے،اس سے قبل میں ریکارڈڈ پروگرام کرچکی تھی، بس اس کے کہنے پر لائیو ٹی وی پروگرام کیا جو کامیاب ہوا۔ لائیو ٹیلیفون کال پر پوچھے گئے سوال کے جواب میں راحت نے کہا کہ میں اپنی ہی بنائی ہوئی پرانی ترکیبیں دہرانا پسند نہیں کرتی،ہر نئے دن ایک نئے جوش سے نیا کام کرنا چاہتی ہوں۔
Bookmarks