پشاور…پشاور سمیت سرحد کے متعدد اضلاع میں سی این جی اسٹیشنز کو آج بھی سوئی ناردرن کی جانب سے گیس کی فراہمی بند ہے جس کی وجہ سے شہریوں کو پریشانی کا سامنا ہے دوسری طرف رکشوں اور ٹیکسی کرایوں میں من مانہ اضافہ کر دیا گیا ہے ۔سوئی ناردرن گیس کی جانب سے ہفتے میں دو دن سی این جی اسٹیشنز کو گیس کی فراہمی پر پابندی کا سلسلہ جاری ہے اور آج دوسرے دن شہر کے سی این جی اسٹیشنز بند ہیں۔ سی این جی اسٹیشنز کل صبح چھ بجے تک رہیں گے۔ سی این جی اسٹیشن بند ہونے کے باوجود گھریلو صارفین کے لئے گیس کے پریشر میں اضافہ نہیں کیا جا سکا ہے۔ سی این جی اسٹیشنز بند ہونے کی وجہ سے رکشہ اور ٹیکسی ڈرائیورز گیس کی جگہ پٹرول استعمال کرنے پر مجبور ہیں اور کرایوں میں بھی دس سے بیس روپے تک کا اضافہ کردیا گیا ہے جبکہ پشاور سے راولپنڈی اور بین الاضلاعی ٹرانسپورٹ کیلئے چلنے والی ویگنوں کے مالکان نے تیل استعمال کرنے کی وجہ سے بچت نہ ہونے کی شکایت کرتے ہوئے ان دو دنوں میں سرکاری سطح پر کرایے بڑھانے کا مطالبہ کیا ہے ۔سوئی ناردرن گیس پائپ لائنز لمیٹڈ پشاور ریجن کے جنرل منیجر خالد پرویز نے جیونیوز کو بتایا کہ حکومت کی جانب سے لگائی گئی پابندی کے باوجود اسٹیشنز بند نہ کرنے والوں کے خلاف تادیبی کارروائی کی جائے گی اور ان اسٹیشنز کو گیس کی سپلائی مزید چار روز تک بند رکھی جائے گی ان کا کہنا تھا کہ اس مقصد کیلئے پشاور ،چارسدہ ،نوشہرہ اور مردان میں چھاپہ مار ٹیمیں تشکیل دیدی گئی ہیں ۔
Bookmarks