اسلام آباد…وزیراعظم یوسف رضا گیلانی نے امریکی سینیٹرز کے وفد کو بتایا ہے کہ کوئٹہ شوریٰ کا کوئی وجود ہے نہ ہی پاکستان میں افغان قیادت موجود ہے۔ وزیر اعظم کا کہنا ہے کہ دہشت گردی کیخلاف جنگ میں پاکستان کے کردار کے متعلق امریکی بیانات افسوسناک ہیں ۔امریکی سینیٹرز کے وفد نے وزیراعظم یوسف رضا گیلانی سے وزیراعظم ہاؤس میں ملاقات کی۔ وفدسے گفتگو کرتے ہوئے وزیراعظم نے کہا کہ پاکستان اور امریکا کے درمیان طویل اسٹریٹیجک شراکت داری کے مفاد میں اعتماد کے فقدان کو دور کرنا ضروی ہے۔ وزیراعظم نے کہا کہ امریکا کولیشن سپورٹ فنڈ کے تحت واجب الادا رقوم جلد ادا کرے۔ پاکستان کو ڈرون ٹیکنالوجی، قابل اعتماد اور قابل کارروائی انٹیلی جنس معلومات فراہم کرے۔ وزیراعظم یوسف نے کہا کہ پاکستان کا نام نئے امریکی اسکریننگ عمل میں شامل ملکوں کی فہرست سے نکالا جائے۔وزیراعظم نے کہا کہ کوئٹہ شوریٰ کا کوئی وجود ہے نہ ہی پاکستان میں افغان قیادت موجود ہے۔ وزیراعظم نے کہا کہ امریکا، افغان حکومت کو راضی کرلے تو پاکستان افغان سرحد پرآہنی باڑ لگانے کے عزم پر قائم ہے۔ وزیراعظم نے کہا کہ امریکا اور دوسری بڑی طاقتیں مسئلہ کشمیر اور دوسرے تنازعات کے حل میں اپنا اثرورسوخ استعمال کریں۔
Bookmarks