نئی دہلی… فارن ڈیسک… بھارت کے دفاعی سازوسامان کی نصف تعداد ناکارہ اور پرانی ہوچکی ہے۔ بھارتی اخبار اکنامک ٹائمز نے اپنی رپورٹ میں کہا ہے کہ بھارت کا صرف 15 فی صد فوجی سازوسامان جدید ہے۔ بھارت کے دفاعی سیکٹر پر پہلی جامع رپورٹ میں کہا گیا کہ بھارت کا نصف فوجی سازوسامان پرانا اور ناکارہ ہو چکا ہے اوراسے جدید اور وقت کے تقاضوں کے مطابق ڈھالنے کی ضرورت ہے۔ ممبئی حملوں کے فوری بعد بھارت نے اپنے دفاعی سامان کی خریداری کی پالیسی میں تبدیلی کی تاہم رپورٹ میں ملک کے سیکورٹی نظام کوانتہائی خطرناک قرار دیا گیا ہے۔ بھارتی وزیر دفاع نے کہا ہے کہ ممبئی حملوں کے بعد ملک کی اندرونی سیکورٹی کو بہتر کرنے پر توجہ دی گئی ہے اور اس سلسلے میں نجی فرموں کا تعاون درکار ہے جو مقامی طور پر سازوسامان تیار کر سکیں۔ حکومت کے خیال میں سوویت دور کے ہتھیاروں کو اپ گریڈ کرنے کی ضرورت ہے تاکہ پاکستان اور چین سے مبینہ خطرات کا مقابلہ کیا جاسکے۔1990 سے مختلف حادثوں میں روسی ساختہ مگ طیارے تباہ ہوچکے ہیں، جس کا سبب بھارتی ائیر فورس نے ان کی ساخت میں نقص قرار دیا ہے۔ واضح رہے کہ بھارت دنیا میں دفاع پر خرچ کرنے میں دسویں نمبر پر ہے اور عالمی دفاعی اخراجات میں بھارت کا دو فی صد حصہ ہے۔ امریکا، برطانیہ، چین، فرانس اور جاپان سب سے زیادہ عالمی دفاعی بجٹ خرچ کرتے ہیں۔
Bookmarks