جلد کرپشن اورکرپٹ مافیا کیخلاف جنگ چھڑنے والی ہے، عمران خان
لاہور : چیئرمین تحریک انصاف عمران خان نے کہا ہے۔ پاکستان کی موجودہ صورتحال کی ذمہ دار ناکام قیادت ہے۔ انہوں نے کہا کہ وصیت یا وراثت سے کوئی لیڈ ر نہیں بن جاتا ۔ انہوں نے کہا کہ ملک میں مخلص، اہل، دیانتدار افراد کی کمی نہیں صرف ان کو پالش کرکے ان کی تربیت کرنے کی ضرورت ہے۔ انہوں نے کہا کہ نواز شریف کو ڈر ہے کہ اگر کرپشن کے حمام کے ننگوں کو کیا گیا توان کا ننگ بھی ظاہر ہوجائگا۔ اس لئے وہ آصف زرداری کا ساتھ دے رہے ہیں۔ انہوں نے کہاکہ سپریم کورٹ کی راہ میں رکاوٹیں کھڑی کی جارہی ہیں لیکن اگر سپریم کورٹ کو کام نہ کرنے دیا گیا تو ہم اسلام آباد کی طرف لانگ مارچ کریں گے۔ اورہمارا لانگ مارچ کسی پر اسرارفون کال پر گوجرانوالہ میں نہیں رکے گا۔ انہوں نے کہا کہ پیپلز پارٹی کی قیادت پر قابض افراد کاغذ کے ایک ٹکڑ ے جس کی کوئی قانونی حیثیت نہیں ہے۔ کو بناد بنا کرلیڈ ر بنے ہوئے ہیں لیکن ہم کہتے ہیں کہ ذہانت اور صلاحیت اور قیادت نہ تو وصیت اور نہ وراثت سے حاصل کی جاسکتی ہے۔ انہوں نے کہا کہ جب تک مسلمانوں کی خلافت کا فیصلہ مسلمانوں کے نیک، متقی اور پارسا لوگ کرتے تھے۔ حکومت قائم رہی اور جب وصیت کا سلسلہ شروع ہوا تو حکومت بادشاہت میں تبدیل ہوگئی۔ اورجب بادشاہت وراثت کی مرہون منت ہوئی تو مسلمانوں کی ریاست کو زوال آنا شروع ہوگیا۔ پاکستان میں بھی سیاست اس روش کا شکار ہے۔ انہوں نے کہا کہ لیڈر قوم کو اعتماد میں لے کر رہنمائی کرتا ہے۔ بند کمروں میں فیصلے کرکے عوام پر ٹھونسنا قیادت نہیں، غاصبوں کا کام ہے۔ انہوں نے کہا کہ عوام کو سیاسی قیادت نے نہیں میڈیا نے شعور دیا ہے۔ مشرف کو شکوہ تھا کہ انہیں میڈیا نے ڈبو دیا ہے۔ آصف زرداری واویلہ کر رہے ہیں کہ میڈیا ان کے خلاف سازش کرہا ہے۔انہوں نے کہا کہ میڈیا کا جن بوتل سے باہر آچکا ہے۔ اب واپس بند کرنا ممکن نہیں۔ انہوں نے کہا کہ آئندہ چھ ماہ میں ملک کے اندر کرپشن کیخلاف جنگ چھڑنے والی ہے۔ انہوں نے کہا کہ نوازشریف نے آصف زرداری کے خلاف مقدمات قائم کئے۔ اب انہیں ڈر ہے کہ زرداری ان کے خلاف مقدمات قائم نہ کریں۔ اس لئے ان کا ساتھ دے رہے ہیں۔ انہوں نے کہا کہ 60 سال میں مختلف حکومتوں نے 40 ارب ڈالر قرضہ لیا۔ مگر موجودہ حکومت نے دو سال میں 15 ارب ڈالر قرض لیا۔ اس قرض کی اقسا ط اور سود پر ہر سال آٹھ سو ارب ڈالر دینے سے ترقیاتی عمل اور صحت و تعلیم کے شعبے متاثر ہیں۔
Bookmarks