لاہور میں زرداری کی پنجابی تقری
لاہور میں زرداری کی پنجابی تقری
صدر نے کہا کہ گورنر پنجاب نے
ان کے سر پر پنجاب کی پگ
رکھی ہے تو اب وہ خطاب
بھی پنجابی میں ہی کریں گے
پاکستان کے صدر آصف زرداری نے اعلان کیا ہے کہ وہ ہر مہینے ایک ہفتہ لاہور میں قیام کیا کریں گے اور دربار لگا کر مسائل کا حل یہیں کیا کریں گے۔
یہ بات انہوں نے گورنر ہاؤس لاہور میں پارٹی کارکنوں اور عہدیداروں کے ایک اجلاس سے خطاب کرتے ہوئے کہی۔
صدر آصف زرداری نے یہ خطاب پنجابی میں کیا۔ انہوں نے پنجاب کے روایتی لباس کا حصہ پگڑی (پگ) پہن رکھی تھی۔
صدر آصف زرداری نے کہاکہ ’گورنر پنجاب صاحب مینوں پنجاب دی پگ پہنائی اے تے مینوں پنجابی اچ تقریر کرنی چائی دی اے۔ میں پنجابی ایتھے لاہور تے پنجاب دی جیلاں تے سکھی اے تے کافی دن ہوگئے نے میں پنجابی اچ گل نہیں کیتی تو ہوسکدا تھوڑی جیی میری پنجابی خراب اے اوہدی مینوں معافی اے۔‘
(گورنر پنجاب صاحب نے مجھے پنجاب کی پگڑی پہنائی ہے تو مجھے پنجابی میں تقریر کرنی چاہیے۔میں پنجابی یہاں لاہوراور پنجاب کی جیلوں میں سیکھی تھی اور اب کافی دن ہوگئےہیں میںنے پنجابی میں بات نہیں کی اس لیے ہوسکتا ہے کہ تھوڑی سی میری پنجابی خراب ہو اس کی مجھے معافی ہے۔)
صدر آصف زرداری نے کہا کہ ’میں نے پروگرام بنایا ہے ہر مہینے ایک ہفتے میں آپ لوگوں کے درمیان رہا کروں گا یہاں میں دربار لگاؤں گا دربار میں ورکروں کو بلاؤں گا یہاں وزیروں کا بٹھاؤں گا اور اس کے بعد فیصلے ہوں گے۔ہر فیصلہ میں یہاں آکر ہی کیا کروں گا۔‘
صدر آصف زرداری نے کہا کہ انہیں علم ہے کہ کارکنوں کے کام نہیں ہورہے ہیں انہیں نوکریاں نہیں مل رہیں۔ وہ غریبوں کے مسائل سے آگاہ ہیں انہیں علم ہے کہ جب بجلی نہیں ہوتی تو کیا ہوتا ہے اور جب گیس نہ ہونے کی وجہ سے چولہا نہیں جلتا تو روٹی پکاتی خاتون خانہ پر کیا گزرتی ہے۔
انہوں نے کہا کہ یہ مسئلے بڑے زمانے سے اکٹھے ہوئے انہیں تین چھ یا ڈیڑھ سال میں ختم نہیں ہوسکتے لیکن پی پی کے ورکروں اورعوام کو یہ علم ہونا چاہیے کہ صدر پاکستان کو غریب کی آواز آرہی ہے۔اسے مسکین کی مزدور کی ہر کارکن ہر ہاری کی آواز آرہی ہے۔
انہوں نے کہا وہ چین، آسٹریلیا یا امریکہ جاتے ہیں تو غریبوں کے لیے جاتے ہیں وہ سات سو ملین ڈالر لے کر آئے ہیں اس رقم سے بتیس ڈیم بننے ہیں اور ان میں چار سے چھ ڈیم پنجاب میں بنیں گے۔
صدر پاکستان نے کہا کہ ’پانی کا بڑا مسئلہ ہے۔کشمیر کی جنگ صرف ایک جنگ نہیں ہے یہ ایک زمین کا ہی مسئلہ نہیں ہے بات یہ ہے کہ ہمیں پانی کا مسئلہ ہے۔ ہمارے آنے والے بچوں کا مسئلہ ہے کل ہمارے بچوں کے بچوں کو پانی کا مسئلہ ہوگا اسی لیے میں پورے ملک میں ڈیم بناتا پھررہا ہوں تاکہ آنے والی نسلوں کو تکلیف نہ ہو۔‘
انہوں نے کہا کہ جو ذوالفقار علی بھٹو اور بے نظیر بھٹو نے کیا اس کا پھل ہم کھا رہے ہیں اور جو ہم کریں گے وہ ہماری آنے والی نسلوں کے لیے ہوگا۔وہ آنے والی نسلوں کے لیے سوچ رہے ہیں۔
صدر مملکت نے کہا کہ پیپلز پارٹی ہر قدم سوچ سمجھ کر اٹھاتی ہے اسی لیے وہ مفاہمت کی حکومت کی بات کرتی ہے اور اداروں کی عزت چاہتی ہے۔انہوں نے کہا کہ ادارے نہیں ہوں گے توجمہوریت نہیں رہے گی اور پاکستان نہیں چل سکے گا ۔اگر پاکستان کو کچھ ہوتا ہے تو پیپلز پارٹی کو سب سے زیادہ تکلیف ہوتی ہے کیونکہ وہ ملک کی سب سے بڑی پارٹی ہے۔
صدر آصف زرداری بدھ کو ہی لاہور پہنچے ہیں پیپلز پارٹی کے رہنماؤں کاکہنا ہے کہ وہ یہ ہفتے لاہور میں ہی گزاریں گے اور سرکاری امور نمٹانے کے علاوہ سیاسی ملاقاتیں کریں گے۔صدر نے جمعرات کو گورنر ہاؤس میں مصروف دن گزارا پارٹی عہدیداروں اور مختلف شعبہ ہائے زندگی سے تعلق رکھنے والے افراد کے وفود سے ملاقاتوں کے علاوہ اخبارات کے مدیران سے بھی ملاقات کی۔
وفاقی وزیر بابر اعوان نے کہا صدر آصف زرداری پنجاب کے بعد بلوچستان جائیں گے اور جس طرح انہوں نے پنجاب میں مقامی زبان میں بات کی ہے اسی طرح بلوچستان میں بھی وہ وہاں کی مقامی زبان میں خطاب کریں گے۔
Reply With Quote
saher sajjad said:
Bookmarks