بی بی سی اردو کراچی
کراچی سمیت سندھ کے زیریں علاقوں میں
شدید بارشوں کا سلسلہ جمعہ کو بھی
جاری ہے اور صوبائی دارالحکومت میں
چھتیں گرنے اور کرنٹ لگنے کے واقعات
میں گیارہ افراد ہلاک ہو گئے ہی
تفصیل
سماجی تنظیم ایدھی کے ترجمان انور کاظمی نے بی بی سی اردو ڈاٹ کام کو بتایا ہے کہ ان کے پاس شہر کے مختلف علاقوں سےگیارہ افراد کی لاشیں لائی گئی
ترجمان کا کہنا تھا کہ ہلاک ہونے والوں میں سے پانچ کرنٹ لگنے، پانچ چھتیں گرنے اور ایک برساتی نالے میں ڈوب کر ہلاک ہوا۔ ان کے مطابق ہلاک شدگان میں ایک بچہ اور تین خواتین بھی شامل ہیں۔محکمۂ موسمیات کے مطابق کراچی کے علاقے مسرور بیس اور اس کے اطراف گزشتہ 20 گھنٹوں میں 142 ملی میٹر بارش ریکارڈ کی گئی ہے جبکہ اندرون سندھ کے علاقے بدین میں 57.6 ملی میٹر بارش ریکارڈ ہوئی ہے۔
جمعرات کی دوپہر شروع ہونے والی بارش سے جہاں موسم خوشگوار ہوا ہے وہیں سڑکوں اور گلیوں میں پانی کھڑا ہو گیا ہے جبکہ بعض نشیبی علاقوں میں برساتی نالوں کا پانی گھروں میں داخل ہوگیا ہے۔ بارش سے آگرہ تاج کالونی، ملیر، اورنگی، کورنگی اور شیر شاہ کے علاقے زیادہ متاثر ہوئے ہی
ں
بارش سے روزمرہ کی زندگی مفلوج ہو کر رہ گئی ہے۔شہر میں پبلک ٹرانسپورٹ نہ ہونے کے برابر ہے جس کی وجہ سے دفاتر اور فیکٹریوں میں حاضری بھی کم رہی ہے۔
محکمہ موسمیات کے مطابق اگلے 24 گھنٹوں میں سندھ کے زیریں علاقوں کراچی، میر پور خاص، ٹھٹہ، مٹھی، عمر کوٹ اور نوابشاہ سمیت بلوچستان کے ساحلی علاقوں میں مزید بارش کا امکان ہے۔ کراچی سمیت سندھ بھر میں ہونے والی بارشیں بھارتی گجرات میں بننے والے ہوا کے کم دباؤ کی وجہ سے ہو رہی ہیں۔
Bookmarks