وفاقي حڪومت چيو آهي ته بينظير ڀٽو جي قتل بابت گڏيل قومن جي ڪميشن کان رپورٽ ۾ شامل ڳالهين جون ثابتيون طلب ڪري ورتيون آهن، محترمه جي قتل جي جن سازش ڪئي، ڪٿي ۽ ڪيئن منصوبو جوڙيو، ان بابت معلوم ٿي ويو آهي، ڪالهه اسلام آباد ۾ صحافين سان ڳالهائيندي وفاقي گهرو وزير رحمان ملڪ چيو ته بينظير ڀٽو جي قتل ڪيس جو عبوري چالان پيش ڪري ڇڏيو آهي، جيتوڻيڪ بينظير ڀٽو قتل بابت گڏيل قومن جي ڪميشن رپورٽ ۾ گهڻيون ڳالهيون سامهون اچي چڪيون آهن، پوءِ به حتمي جاچ اچڻ بعد عوام آڏو آڻينداسون ۽ ذميوارن کي ڪٽهڙي ۾ آندو ويندو، ٿورو صبر ڪرڻو پوندو، هي وڏو واقعو آهي، اهڙي قسم جي جاچ ۾ وقت لڳندو آهي ۽ ثابتيون ڪٺيون ڪرڻ پڻ وقت طلب ڪم آهي، فائنل جاچ رپورٽ اچڻ بعد عوام کي سڀني حقيقتن کان آگاهه ڪنداسين، رحمان ملڪ چيو ته گڏيل قومن جي بينظير ڀٽو جي قتل بابت جاچ ڪميشن جي رپورٽ ۾ ٻڌ سڌ وارين ڳالهين جا ثبوت گهريا آهن، جيئن ثابتيون رڪارڊ جو حصو ٿي سگهن، گهرو وزيرن جي سارڪ ڪانفرنس ۾ انڊيا جي گهرو وزير سان ملاقات ٿيندي، قصاب سميت ٻين معاملن تي غور ڪيو ويندو، ٻئي طرف گهرو وزير رحمان ملڪ اسلام آباد ۾ وزير اعظم يوسف رضا گيلاني سان پڻ ملاقات ڪئي آهي.
Bookmarks