khuda ka shukr hai
khuda ka shukr hai paida hue muslim ghrane mei.n
yeh woh daulat hai jo qaayim rahegi har zamane mei.n
hum us dee.n ke muhafiz hai.n jo adam saath laaye they
hamara taur haabeeli raha hai har zamane mei.n
badi takleefe.n sahkar nooh ne is dee.n ko pahunchaya
na mani qaum to kee baddua apne zamane mei.n
janabe nooh ki kashti bani gahwara momin ka
pahaad oonche na aaye kaam kaafir ko bachane mei.n
baraheemi nazar ne tod dala qasre namroodi
khaleelullah ka ehsaa.n hai hum par har zamaze mei.n
bacha kar apni esmat ko jo pahunche qaid mei.n yousuf
misaali naojawa.n bankar rahe.n hai.n har zamane mei.n
nabi ke haath mei.n loha jo aata mome banjata
hai dawoodi mehak duniya ke har ek kaarkhane mei.n
khuda ne mere zakhmo.n mei.n hai rakkha rizq keedo.n ka
sukoo.n milta hai makhlooqe khuda ke kaam aane mei.n
woh dekho sabre ayyoobi woh beemaari woh tanhaayee
aham kirdaar tha ayyoob ka dee.n ko sajane mei.n
muqabil zulm ke moosa jo aaye taankar seena
khuda ne kee madad firown sa zaalim mitane mei.n
kiya murde ko zinda woh gire sajde mei.n phir eesa
mai.n banda hoo.n khuda ka yeh bataya us zamane mei.n
badi mehnat se pahunchaya sabhi nabiyo.n ne is dee.n ko
lahu dekar bachayee hai shariat har zamane mei.n
phir aaye banke rahmat saare aalam keliye ahmed
hai kirdare mohammed hum pe hujjat har zamane mei.n
hifazat dee.n ki kaise hoti hai batlaya haider ne
chalo islam mein rach bas ke chaaye.n har zamane mei.n
suno haamid yaqeenan woh musalmaa.n ho nahi.n sakte
guzarti zindagi jinki hai ladne aur ladane mei.n
Bookmarks