کراچی (اسٹاف رپورٹر)
پاکستان کرکٹ بورڈ نے پیر کو اسٹار بیٹسمین محمد یوسف کے ویزے کے لئے اسلام آباد میں برطانوی ہائی کمیشن کو درخواست دے دی۔ پی سی بی کے حکام پرامید ہیں کہ محمد یوسف جمعے سے شروع ہونے والے دوسرے ٹیسٹ سے قبل برمنگھم میں پاکستان ٹیم کو جوائن کر لیں گے جب کہ اسپنر رضا حسن جو لندن میں ہیں ان کا اسپورٹس ویزہ برطانیہ ہی سے حاصل کرنے کی کوشش کی جا رہی ہے۔ ذرائع کے مطابق محمد یوسف لاہور کی قومی اکیڈمی میں ٹریننگ کر رہے ہیں۔ پی سی بی کے حکام برطانوی ہائی کمیشن کے حکام سے رابطے میں ہیں تاکہ یوسف کو ارجنٹ بنیادوں پر ویزا جاری کیا جا سکے۔ قومی ٹیم کے منیجر یاور سعید کا کہنا ہے کہ محمد یوسف اور رضا حسن کے پاس برطانیہ کا وزٹ ویزہ موجود ہے۔ برطانوی فارن آفس سے درخواست کی جا رہی ہے کہ دونوں کے ویزوں کے اسٹیٹس تبدیل کردیئے جائیں۔پی سی بی کے ذرائع کا کہنا ہے کہ منگل کو محمد یوسف کو برطانیہ کا ویزا مل جائے گا۔ تاہم وہ دوسرا ٹیسٹ کھیلنے کا ارادہ نہیں رکھتے۔ یوسف انگلینڈ جاکر ایک ہفتہ پاکستان ٹیم کے ساتھ ٹریننگ کریں گے۔ 13/اگست سے شروع ہونے والے سہ روزہ میچ میں حصہ لیں گے۔ توقع ہے کہ وہ 18/اگست سے اوول میں شروع ہونے والے تیسرے ٹیسٹ میں شرکت کریں گے۔
Bookmarks