سزا کے فیصلے پر مایوسی ہوئی: محمد عامر،تاحیات پابندی لگنی چاہیے تھی:برطانوی کھلاڑی
اسپاٹ فکسنگ الزام میں آئی سی سی کی جانب سے پابندی کا شکار محمد عامر نے فیصلے پر مایوسی کا اظہار کر دیا ہے ۔ادھر برطانوی کھلاڑیوں نے کہا ہے کہ پاکستانی کھلاڑی مجرم تھے تو ان پر تاحیات پابندی لگنی چاہیے تھی جبکہ ہارون لورگاٹ نے فیصلے کو کرکٹ میں کرپشن روکنے کے لئے خوش آئندقرار دیا ہے ۔
دوحا میں ایک ویب سائٹ کو انٹرویو دیتے ہوئے فاسٹ باولر محمد عامر کا کہنا تھا کہ انٹرنیشنل کرکٹ کونسل کے اینٹی ٹربیونل کمیٹی کے فیصلے پر انتہائی حیرانی اور مایوسی ہوئی ہے انہوں نے کہا کہ جس طرح کے حالات تھے ۔ اسپاٹ فکسنگ کیس کے فیصلے میں انہیں سخت سزا کی توقع نہیں تھی تاہم انہوں نے بتایا کہ وہ اپنے وکیل سے مشاورت کر کے پابندی کیخلاف اپیل کا فیصلہ کریں گے۔ ادھرانگلینڈ کے سابق کرکٹر فلنٹوف کا کہنا ہے کہ پاکستانی کرکٹرز کو پانچ سے دس سال کی پابندی کی سزائیں دینا ٹھیک نہیں ہے اگر پاکستانی کھلاڑی مجرم تھے تو ان پر تاحیات پابندی لگنی چاہیے تھی اور اگر بے گناہ تھے تو انہیں کھیلنے کا موقع ملنا چاہیئے تھا ۔ کھلاڑیوں کو غلطی تسلیم کرنے کی اتنی بڑی سزا نہیں ملنی چاہئے . سابق انگلش کپتان مائیکل وان نے کہا کہ تینوں پاکستانی کرکٹرز پر تاحیات پابندی ہونی چاہیے تھی۔ دوسری جانب آئی سی سی چیف ایگزیکٹو ہارون لورگاٹ نے کہا کہ محمد آصف،عامر اور سلمان بٹ کے خلاف پابندی کا فیصلہ کرکٹ میں کرپشن ختم کرنے کے لیے ایک اہم مثال ثا بت ہوگا۔
Bookmarks