ورلڈ کپ 2011: آئر لینڈ نے انگلینڈ کو 3 وکٹ سے شکست دے دی
ورلڈکپ کے پندرہویں میچ میں انگلینڈ نے آئرلینڈ کو جیت کیلئے تین سو اٹھائیس رنز کا ہدف دیا جو آئر لینڈ نے انچاس اعشاریہ ایک اوورز میں سات وکٹوں کے نقصان پر پورا کر لیا۔
میچ کے آغاز میں آئر لینڈ کو پہلی ہی گیند پر پورٹر فیلڈ کی شکل میں نقصان اٹھانا پڑا۔ پال سٹرلنگ اور ایڈ جوئیسی نے سکور میں 64 رنز کا اضافہ کیا۔ پال سٹرلنگ بریسنن کی گیند پر پیٹرسن کے ہاتھوں 32 رنز بنا کر کیچ آؤٹ جبکہ جوئیسی 32 ہی رنز بنا کر سوان کی گیند پر میٹ پرائر کے ہاتھوں سٹمپ آؤٹ ہوئے۔ نیئل اوبرائن 29 رنز کا اضافہ کر کے سوان کا شکار بن گئے۔ گیری ولسن صرف تین رنز کا اضافہ کر کے سوان ہی کے ہاتھوں ایل بی ڈبلیو آؤٹ ہو کر پویلین واپس لوٹ گئے۔ ان کے بعد آنے والے کیون اوبرائن نے جارحانہ اننگز کھیلتے ہوئے 6 چھکوں اور 13 چوکوں کی مدد سے 133 رنز بنا کر میچ کا پانسہ ہی پلٹ دیا۔ اوبرائن نے ورلڈ کپ کی تاریخ کی تیز ترین سنچری بنانے کا ریکارڈ بھی اپنے نام کر لیا۔ آئر لینڈ نے انچاس اعشاریہ ایک اوورز میں سات وکٹوں کے نقصان پر ہدف حاصل کر لیا۔ بنگلور میں کھیلے گئے گروپ بی کے میچ میں انگلینڈ نے ٹاس جیت کر پہلے بیٹنگ کی اور مقررہ پچاس اوورز میں آٹھ وکٹ پر تین سو ستائیس رنز کے ٹوٹل کا پہاڑ کھڑا کر دیا جسے آئر لینڈ نے سر کر لیا۔ انگلینڈ کی اننگز میں جوناتھن ٹروٹ بانوے، این بیل اکاسی اور کیون پیٹرسن انسٹھ رنز کیساتھ نمایاں رہے۔ کپتان سٹراس نے چونتیس رنز کا اضافہ کیا۔ آئرلینڈ کے مُونی نے چار حریف کھلاڑیوں کی اننگز کا خاتمہ کیا۔ جونسٹن نے دو وکٹیں حاصل کیں۔
Bookmarks