UPDATE
شاہ عبداللہ نے مسجد الحرام کے توسیعی منصوبے کاسنگ بنیاد رکھ دیا
خادم حرمین شریفین شاہ عبد اللہ نے گزشتہ شب مسجد الحرام کی تاریخ کے سب سے بڑے توسیعی منصوبے کا سنگ بنیاد رکھا جو تین سال میں مکمل ہو گا -
یہ توسیع مسجد کی موجودہ عمارت کے شمال مشرقی اور شمال مغربی جانب چار لاکھ مربع میٹر پر محیط ہو گی- اس مقصد کی خاطر مسجد سے ملحقہ اراضی حاصل کرنے کے لئے یہاں واقع ہزاروں چھوٹی بڑی عمارتوں کے مالکان کو 40ارب ریال معاوضہ ادا کیا گیا ہے -نئے بلاک کی تکمیل سے مسجد الحرام میں نمازیوں کی گنجائش میں 12لاکھ کا اضافہ ہو گا اورمسجدکے اندربیک وقت مجموعی طور پر 20لاکھ افراد عبادت کر سکیں گے--- منصوبے کوشاہ عبداللہ توسیعی پراجیکٹ کا نام دیا گیا ہے - اس کے تحت مسجد کی شمالی جانب 380میٹرچوڑائی میں چار منزلہ نیا بلاک تعمیر کر کے اسے مرکزی عمارت کے ساتھ ملحق کر دیا جائے گا اور ایک کثیر المنزلہ پل کے ذریعے صفا اور مروہ کے درمیان سعی کر نے والے راستے سے بھی ملا دیا جائے گا - نئے عمارتی بلاک کا ایک مرکزی دروازہ ہو گا جسے شاہ عبداللہ گیٹ کہا جائے گا -اس کے اوپر تین گنبد اور دو نئے مینار تعمیر کئے جائیں گے- نئے بلاک میں تہہ خانہ ، گراؤنڈ فلور ، فرسٹ فلور اور سکینڈ فلور تعمیر کیا جائے گا جو مکمل طور پر ایئر کنڈیشنڈ ہو گا ۔ شمالی جانب سے نمازیوں کو مسجد کے صحن میں پہنچانے کے لئے زیر زمین راستے بھی تعمیر کئے جائیں گے - - منصوبے پر کام شروع کرنے کے لئے مسجد الحرام کی موجودہ عمارت میں باب فتح اور باب عمرہ کے بالمقابل واقع محلہ الشامیہ ا ور الشبیکہ میں40 ارب ریال معاوضہ ادا کر کے ایکوائر کی جانے والی ہزاروں عمارتوں کومسمار کر کے زمین ہموار کرنے کا کام مکمل کرلیا گیا ہے-
Bookmarks