آپ میں سے چند افراد آئی فون، آئی پیڈ یا آئی پوڈ پر جیل بریکنگ کے لفظ سے واقف تو ہوں گے۔ جیل بریکنگ آپ کو مفت تھرڈ پارٹی ایپس ڈاؤنلوڈ کرنا، اپنی ڈیوائس میں ٹویک اور تبدیلیاں کرنا یا قیمتاً فروخت ہونے والی ایپس مفت میں ڈاؤنلوڈ کرنا ممکن بناتی ہے۔ گو کہ اینڈرائیڈ پر یہ کچھ مختلف ہے، لیکن جیل بریکنگ اور ‘روٹنگ’ کے مقاصد ایک ہی ہیں۔
ہمیں معلوم ہے کہ اینڈرائیڈ ایک اوپن سورس آپریٹنگ سسٹم ہے، جس کا مطلب ہے کہ آپ مفت میں ایپس ڈاؤنلوڈ کر سکتے ہیں چاہے وہ قیمتاً دستیاب ہوں یا مفت ہی ہوں، اور وہ بھی بغیر کوئی ٹکا ادا کیے یا بغیر کسی محنت کے لیے لیکن سوال یہ اٹھتا ہے کہ اگر میرا اینڈرائیڈ مجھے مفت میں ایپس ڈاؤنلوڈ کرنے کی پہلے ہی سے اجازت دیتا ہے؟ تو میں اسے روٹ یا جیل بریک (یا اَن لاک) کیوں کروں؟
تو اس سوال کا جواب ہے کہ روٹنگ آپ کو اینڈرائیڈ کا سپر یوزر یا دوسرے الفاظ میں ایڈمنسٹریٹر بنا دیتی ہے جو اینڈرائیڈ کو مکمل طور پر موڈیفائی کر سکتا ہے، اس کو بظاہر بھی اور اس کے کام کرنے کے انداز کو بھی۔ روٹنگ ایچ ٹی سی، سام سنگ، سونی وغیرہ جیسے ڈیوائس تیار کرنے والے اداروں کی جانب سے لگائی گئی پابندیوں کا خاتمہ کر دیتی ہے، یہ پابندیاں ڈیوائس کو ممکن حد تک مستحکم رکھنے کے لیے لگائی جاتی ہیں۔
روٹنگ آپ کو تھرڈ پارٹی ایپس استعمال کرنے کی اجازت دیتی ہے۔ گو کہ آپ روٹنگ سے پہلے بھی تھرڈپارٹی ایپس انسٹال کر سکتے ہیں لیکن آپ اس کی مکمل خصوصیات کو استعمال نہیں کرپاتے۔ مثال کے طور پر ایک ایپ ہے روٹ ایکسپلورر، جسے اینڈرائیڈ پر روٹنگ سے پہلے بھی انسٹال کیا جا سکتا ہے، لیکن آپ اسے صرف فائل ایکسپلورر کی حیثیت سے استعمال کر سکتے ہیں لیکن اگر آپ ڈیوائس کو روٹ کریں، تو آپ کو سسٹم فائلز/پروگرام فائلز میں گھسنے کی بھی اجازت مل جائے گی جہاں آپ مختلف چیزوں سے چھیڑ چھاڑ کر سکتے ہیں اور کچھ ٹویکنگ بھی کر سکتے ہیں، جیسا کہ اسٹاک ایپس ڈیلیٹ کرنا جو آپ کی ڈیوائس کی انٹرنل میموری میں جگہ گھیرتی ہیں یا بیک گراؤنڈ میں چل کر آپ کی بیٹری کو کھاتی رہتی ہیں۔
تو روٹنگ کیا کر سکتی ہے؟
روٹنگ کے بہت سے فوائد ہیں لیکن اس کے نقصانات بھی ہیں جو ان چند افراد کے لیے دردِ سر بن جاتی ہے جو اپنی ڈیوائس کے حوالے سے بہت پریشان رہتے ہیں۔ تو آئیے اینڈرائیڈ کو روٹ کرنے کے فوائد اور نقصانات دیکھیں۔
فوائد
ڈیوائس کا فونٹ تبدیل
ایل جی آپٹیمس سیریز اور سام سنگ گلیکسی سیریز جیسی چند ڈیوائسز فونٹ چینجر کے ساتھ آتی ہیں لیکن پھر بھی ان میں فونٹس کی تعداد محدود ہوتی ہے اور سونی ایکس پیریا جیسی چند ڈیوائسز تو سرے سے فونٹ ہی چند نہیں کر سکتیں۔ اور اگر گوگل پلے میں فونٹ تبدیل کرنے والی ایپس کو دیکھا جائے تو ان کی تعداد بھی بہت کم ہے۔ روٹنگ آپ کو اس معاملے میں مکمل آزادی دے سکتی ہے اور فونٹ انسٹالر جیسی ایپس اس کام کو بہتر انداز میں انجام دے سکتی ہیں۔
اوورکلاکنگ
آپ میں سے بہت سے ساتھی اوورکلاکنگ کی اصطلاح سے اقف نہیں ہوں گے۔ مینوفیکچررز ایسے پروسیسرز استعمال کرتے ہیں جو عام پروسیسرز کے مقابلے میں بہتر کارکردگی پیش کر سکیں لیکن وہ پروسیسر کے لیے عادتاً ایک مستحکم فریکوئنسی متعین کر دیتے ہیں تاکہ ڈیوائس گرم نہ ہو جائے (اور ممکنہ طور پر آگ نہ پکڑ لے)۔
اسے سی پی یو فریکوئنسی کنٹرولر ایپس کے ذریعے تبدیل کیا جا سکتا ہے جو پروسیسر کی فریکوئنسی کو موڈیفائی کر سکتا ہے۔ مثال کے طور پر نیکسس ایس 1 گیگاہرٹز کے پروسیسر کے ساتھ آتا ہے لیکن ذرا سی چھیڑچھاڑ کے بعد آپ اس کی رفتار کو 1.1 گیگاہرٹز بلکہ اس سے بھی اوپر تک اپگریڈکر سکتے ہیں۔
یہ آپ کی اینڈرائیڈ ڈیوائس کی کارکردگی کو بڑھا دے گا اور گیمز اور دیگر کاموں میں بہتر فریم ریٹ دے گا لیکن ساتھ میں بیٹری کو بھی بہت جلدی خرچ کرے گا۔ اوورکلاکنگ کے لیے بہترین ایپ سیٹ سی پی یو ہے جو روٹ صارفین کے لیے ہے۔
انڈرکلاکنگ
یہ اوورکلاکنگ کی بالکل الٹ چیز ہے۔ انڈرکلاکنگ کا مطلب ہے کہ پروسیسر کی فریکوئنسی کو کم کر دینا مثال کے طور پر نیکسس ایس کا پروسیسر 1 گیگاہرٹز کا ہے، لیکن اسے 800 میگاہرٹز یا اس سے بھی کم تک لایا جا سکتا ہے۔ یہ ڈیوائس کی کارکردگی کو تو گھٹا دے گا لیکن آپ کی بیٹری کو بہت زیادہ بچائے گا اور ڈیوائس کو گرم ہونے سے بھی محفوظ رکھے گا۔ سیٹ سی پی یو یہاں بھی کارآمد ایپ ہے۔
ڈیوائس اینڈرائیڈ کے تازہ ترین ورژن پر اپگریڈ
آپ کو معلوم ہوگا کہ تمام ڈیوائسز کو ان کے مینوفیکچررز کی جانب سے اپگریڈ نہیں کیا جاتا۔ اس کا مطلب ہے کہ آپ اینڈرائیڈ کے پرانے ورژن پر اٹکے رہیں اور مقابلے کی دوڑ میں چند قدم پیچھے ہی رہیں لیکن روٹنگ کے ذریعے آپ کے لیے ممکن ہوگا کہ اپنی ڈیوائس کو اینڈرائیڈ او ایس کے تازہ ترین ورژن پر اپگریڈ کر سکیں۔
یہی وجہ ہے کہ آجکل بیشتر افراد اپنی ڈیوائسز کو روٹ کروا رہے ہیں کیونکہ یہ انہیں تمام نئی خصوصیات اور نظارے فراہم کرنے کی اجازت دیتی ہے جو اینڈارئیڈ کے جدید ورژن میں دستیاب ہیں۔ لیکن اس میں ایک مسئلہ ہے، وہ بھی بڑا گمبھیر: اگر آپ کو نہیں معلوم کہ اینڈرائیڈ ڈیوائس کو اپگریڈ کرنے کا موزوں طریقہ کیا ہے تو ہو سکتا ہے آپ اپنے فون کو خراب کر بیٹھیں اس لیے میں تجویز نہیں کروں گا کہ آپ اپنے بل بوتے پر اپگریڈ کرنے کا بیڑہ اٹھائیں بلکہ بہتر یہی ہے کہ کسی موبائل شاپ یا کسی ماہر فرد سے یہ کام کروائیں۔
ایپس ایس ڈی کارڈ پر محفوظ
پرانی یا سستی اینڈرائیڈڈیوائسز میں انٹرنل میموری بہت کم ہوتی ہے اور کبھی کبھار ایسی ڈیوائس میں ایس ڈی کارڈ پر محفوظ کرنے کا آپشن تک موجود نہیں ہوتا۔ لنکس 2 ایس ڈی اور ایپس 2 ایس ڈی جیسی ایپس کے استعمال سے آپ اپنی ایپلی کیشنز کو ایس ڈی کارڈ میں منتقل کر سکتے ہیں جو آپ کی انٹرنل میموری میں بہت ساری جگہ بچائے گا۔
اینڈرائیڈ کی سسٹم فائلز تک مکمل رسائی
آپ کو ڈیفالٹ میں اینڈرائیڈ کی سسٹم فائلز، ان کسٹمائزڈ روم تک رسائی کی اجازت نہیں ہوتی، لیکن روٹنگ کے بعد آپ ان تک رسائی حاصل کر سکتے ہیں تاکہ آپ اپنی مرضی کے مطابق اسے ٹویک کر سکیں۔ یہ خصوصیت اینڈرائیڈ ڈیولپرز کے لیے بہت کارآمد ہے۔ ایپ جو اس مقصد کے لیے استعمال کی جا سکتی ہے روٹ ایکسپلورر کہلاتی ہے۔
اسٹاک سسٹم ایپس ڈیلیٹ
چند افراد ان اسٹاک اینڈرائیڈ ایپس کو نہیں رکھنا چاہتے جو فون کے ساتھ آتی ہیں، جو نہ صرف قیمتی اسٹوریج کو گھیرے رکھتی ہیں بلکہ بیک گراؤنڈ میں چل کر بیٹری لائف کو بھی گھٹاتی ہیں۔ البتہ روٹنگ کے بعد اب ان ایپس سے بھی چھٹکارہ پا سکتے ہیں اور اپنی انٹرنل میموری، بیٹری لائف اور ریم بچا سکتے ہیں۔ روٹ ایکسپلورر اسٹاک ایپس ڈیلیٹ کرنے کے لیے بھی استعمال کی جا سکتی ہے۔
انسٹال/فلیش کسٹم رومز
کسٹم روم کو فلیش کرنا آپ کو اینڈارئیڈ کا موڈیفائیڈ یا کسٹم ورژن انسٹال کرنے کی اجازت دیتا ہے۔ آپ اپنا ذاتی یا کسی اور کا کسٹم روم استعمال کر سکتے ہیں جو ایکس ڈی اے ڈیولپرز کی جانب سے اپلوڈ شدہ ہو یا ڈیولپرز کے اپنے بلاگ پر۔ کسٹم روم کچھ مختلف کام کرتا ہے اور نظر بھی الگ آتا ہے کیونکہ یہ اسٹاک روم کے مقابلے میں زیادہ موڈیفائیڈ ورژن ہوتا ہے۔ یہ کم ریم بھی استعمال کر سکتا ہے اور اس میں مختلف لانچرز اور سیٹنگز بھی ہو سکتی ہیں جو اینڈرائیڈ کے اسٹاک یا اسٹینڈرڈ ورژن کے ساتھ نہیں آتے۔ یہاں استعمال کی جانے والی ایپ روم مینیجر ہے۔
اپنے ڈیٹا کا مکمل بیک اپ
روٹنگ کے بغیر اپنے ڈیٹا کا بیک اپ لینے کے لیے ایپس موجود ہے لیکن وہ کسی حد تک محدود ہیں کہ وہ صرف ایپس، کانٹیکٹس وغیرہ کا بیک اپ لے سکتی ہیں، چند ایپس آپ کے ڈیٹا کا مکمل بیک اپ بھی لے سکتی ہیں۔ اس کام کے لیے ٹائی ٹینیم بیک اپ تجویز کردہ ایپ ہے۔
اسکرین شاٹس
اینڈرائیڈ آئس کریم سینڈوچ میں آنے والی بڑی حصوصیات میں سے ایک اسکرین شاٹ لینے کی صلاحیت ہے جو پرانے ورژن پر چلنے والی بیشتر اینڈرائیڈ ڈیوائسز میں ناممکن تھا۔ روٹنگ آپ کو اسکرین شاٹ حاصل کرنے کی ‘آزادی’ دیتی ہے اور کہیں زیادہ آپشن بھی کہ اسے فوری طور پر کیسے لیں۔ اسکرین شاٹ ایپ کے استعمال سے آپ اپنی روٹ شدہ ڈیوائس پر اسکرین شاٹس لے سکتے ہیں۔
بوٹ لوڈنگ اینی میشن تبدیل
روٹنگ آپ کو کسٹم بوٹ اینی میشن ڈاؤنلوڈ کرنے اور استعمال کرنے کی اجازت دیتی ہے، اس لیے جب بھی آپ اپنی اینڈرائیڈ ڈیوائس کو کھولیں گے آپ کو مختلف اینی میشن اسکرین پر چلتی ہوئی نظر آئیں گی۔ بوٹ اینی میشنز جیسی ایپس اسٹاک بوٹ لوڈنگ اسکرینز کو تبدیل کرنے کے لیے استعمال کی جاتی ہیں۔
اشتہارات بلاک
مفت ایپ استعمال کرنے کے دوران اچانک سامنے آ جانے والے اشتہارات کو آپ روٹنگ کے ساتھ ختم بھی کر سکتے ہیں۔ مثال کے طور پر اینگری برڈ کا مفت ورژن کھیلتے ہوئے ایک اشتہار اسکرین کے اوپر آ جاتا ہے جو آپ کے گیم پلے میں خلل ڈالتا ہے۔ البتہ روٹنگ کے بعد آپ ان اشتہارات کو ایڈفری اینڈرائیڈ استعمال کر کے ہٹا سکتے ہیں۔
اینڈرائیڈ او ایس میں اصلی لینکس کمانڈز
روٹنگ کے بعد آپ لینکس کے جیسا اینڈرائیڈ ٹرمینل استعمال کر سکتے ہیں، جو آپ مختلف کمانڈز کے لیے استعمال ہو سکتا ہے۔ اینڈرائیڈ ٹرمینل ڈیولپرز کے لیے ایک بہت کارآمد چیز ہے۔ اینڈرائیڈ ٹرمینل ایمولیٹر اس مقصد کے لیے استعمال کی جانے والی ایپ ہے۔
کچھ دیگر فوائد بھی ہیں لیکن یہ بڑی وجوہات ہیں کہ آپ کو روٹ کیوں کرنا چاہیے۔ لیکن روٹنگ کے نقصانات بھی ہیں، جن کی فہرست یہ ہے۔
روٹنگ کے نقصانات
ڈیوائس کا رک جانا
روٹنگ آپ کی ڈیوائس کو کام کرنے سے مکمل طور پر بھی روک سکتی ہے۔ وہ افراد جو کی اصطلاح سے واقف نہیں انہیں بتاتے چلیں کہ برکنگ کا مطلب ہے کہ آپ کی ڈیوائس مکمل طور پر ہینگ ہو جائے اور آپ اسے کھول بھی نہ پائی۔برکنگ کا سبب بننے والی اہموجوہات میں کسٹم روم فلیش کرنا ہےکیونکہ کسٹمز رومز کبھی کبھار آپ کی ڈیوائس کے لیے موزوں نہیں ہوتیں۔
یہ کوئی اتنی بھیانک صورتحال نہیں ہے کیونکہ چند حالات میں آپ کی ڈیوائس مکمل طور پر ری اسٹور کرنے کی قابل ہے۔ وقت کے ساتھ ساتھ ڈیولپرز نے برک شدہ ڈیوائس کو ری اسٹور کرنے کے بہت سارے طریقے تلاش کیے ہیں اور سونی جیسے ادارے نےپی سی کمپینین جیسے سافٹویئر بھی بنائے ہیں جو برک شدہ ایکس پیریا فون کو ری اسٹور کر سکتے ہیں لیکن اس کے بعد بھی مسئلہ موجود رہتا ہے۔
وارنٹی کا خاتمہ
مجھے معلوم ہے کہ آپ کو بہت برا محسوس ہو رہا ہوگا لیکن حقیقت یہی ہے کہ روٹ کیے جانے کی صورت میں آپ کی اینڈرائیڈ ڈیوائس کی وارنٹی مکمل طور پر ختم ہو جائے گی۔
کیا روٹنگ قانونی ہے؟ کیا گوگل اس کی اجازت دیتا ہے؟
اس کا جواب ہے، جی ہاں! گوگل آپ کواپنی اینڈرائیڈ ڈیوائس کو روٹ کرنے کی اجازت دیتا ہے اور انہیں اس سے کوئی مسئلہ نہیں حتیٰ کہ روٹ کرنے کے بعد بھی آپ کو، تقریباً تمام حالات میں، پلے اسٹور سے ایپس ڈاؤنلوڈ کرنے کی اجازت ہے، وہ بھی بغیر کسی پابندی کے۔
اپنی ڈیوائس کو روٹ کرنے سے قبل یقینی بنا لیں کہ آپ نے اپنی ڈیوائس کے حوالے سے بلاگز پڑھ لیے ہیں کیونکہ مختلف ڈیوائسز کو روٹ کرنے کے دوران چند چیزیں مختلف ہو سکتی ہیں۔ اینڈرائیڈ میں روٹ رسائی حاصل کرنے کے لیے استعمال ہونے والا سب سے مشہور اور قابل بھروسہ سافٹویئر اس وقت فرما روٹ اور ٹاؤل روٹ ہے۔
اب بھی ہم آپ کو مکمل تحقیق کرنے کی تجویز دیں گے کہ آپ کی ڈیوائس کیسے روٹ ہوگی، اس سے پہلے کوئی ایک غلط قدم آپ کی ڈیوائس کو ناقابل استعمال بنا دے۔
ایسی بہت ساری وڈیوز، گائیڈز اور واک تھروز موجود ہیں جن سے آپ با آسانی معلومات حاصل کر سکتے ہیں۔
اس لیے بخوشی روٹنگ کیجیے!
بشکریہ: خان جان
Senior Member+
Ijaz Farooq said:
Posting Permissions
Reply With Quote
Bookmarks