^^^^Yun Hausla Dil Ne Haaraa Kab Tha^^^^
YuN hausla dil ne haaraa kab tha
Sartaan mera sitaaraa kab tha
Laazim tha guzarna zindagi se
Bin zehr piye guzaaraa kab tha
Kuchh pal use aur dekh sakte
AshkoN ko magar gawaaraa kab tha
Hum khud bhi judaayi ka sabab the
Uska hi qusoor saaraa kab tha
Ab aur ke saath hai to kya dukh
Pahle bhi koi hamaaraa kab tha
Ek naam par zakhm khil uthe the
Qaatil ki taraf ishaaraa kab tha
Aaye ho to raushni hui hai!!
Is baam par koi taaraa kab tha
Dekha hua ghar tha par kisi ne
Dulhan ki tarah saNwaaraa kab tha
Reply With Quote
Bookmarks