جانوروں سے محبت اور شفقت انسانی فطرت کا حصہ ہے کیونکہ جانور انسان کیلئے متعدد فوائد کے حامل ہیں لیکن فن لینڈ کے سائنسدانوں نے دریافت کیا ہے کہ جانور ہمارے لئے صرف وفادار ساتھی ہی نہیں بلکہ خطرناک بیماریوں سے بچاﺅ کا ذریعہ بھی ہیں۔ ذیا بیطس پر کی گئی ایک تحقیق میں معلوم ہوا کہ جن بچوں کو ابتدائی عمر میں کتوں کی قربت ملتی ہے وہ اس مرض سے بڑی حد تک محفوظ رہتے ہیں۔ یونیورسٹی آف ہیلنسکی اور دیگر اداروں نے اس مقصد کیلئے 3,000 سے زائد ننھے بچوں پر تحقیق کی۔ نتائج سے ظاہر کیا کہ جن گھروں میں پالتو کتے پائے جاتے ہیں اور ایک سال سے کم عمر بچوں کو ان کی قربت ملتی ہے ان بچوں میں ذیابیطس کا خطرہ واضح طور پر کم ہو جاتا ہے۔ اس سے پہلے یہ شواہد بھی مل چکے ہیں کہ گھر میں پالتو جانوروں کی موجودگی سے ننھے بچوں میں مدافعت پیدا ہوتی ہے اور وہ آنے والی زندگی میں الرجی سے بڑی حد تک محفوظ ہو جاتے ہیں۔
موجودہ تحقیق میں یہ بات بھی سامنے آئی کہ زیابیطس سے بچاﺅ کیلئے صرف کتے ہی مفید ہیں، باقی جانوروں میں یہ خاصیت نہیں پائی جاتی۔ یہ تحقیق امریکن میڈیکل ایسوسی ایشن پیڈی ایٹرکس کے سائنسی جریدے میں شائع ہوئی ہے۔
Bookmarks