Sakhi Fasiq Aur Bakheel Zahid - Kon Behtar?? Must Read
سخی فاسق اور بخیل زاہد ،، کون بہتر ؟؟ لازمی پڑھیں
اگر مجھے سخی فاسق اور بخیل زاہد میں سے ایک کا انتخاب کرنا پڑے یا کسی ایک کے قریب رہنا پڑے تو میں خوشی سے سخی فاسق کو ترجیح دونگا۔۔ وجہ ؟؟
اس کی وجہ میرے نزدیک یہ ہے کہ ایک سخی بندہ اللہ پاک کے پسندیدہ بندوں میں سے ہوتا ہے اور وہ اللہ کی مخلوق کا خیال ، دھیان اور احترام کرتا ہے ، پھر چاہے وہ خیال یا دھیان کسی طرح کا یا کسی لیول کا ہی کیوں نہ ہو ۔۔ اور وہ اللہ کی مخلوق کا دوست ہوتا ہے ، چاہے وہ مخلوق انسان ہو یا حیوان ۔۔ لیکن اس سخی بندے کے دل میں اللہ کی مخلوق سے پیار ، احترام اور مدد کا جذبہ ہوتا ہے ۔۔ جہاں تک بات ہے اس کے دیگر گناہوں کی تو غلطیاں کس میں نہیں ہوتیں ؟؟ بجائے اس کے گناہوں کی وجہ سے اس سے دور ہونے کے ،، اسے پیار محبت سے دین ، عقائد اور فضائل کی دعوت دینا سب سے مستحسن رہے گا ۔۔ اور جب بندہ صدق دل سے ایسے لوگوں پر محنت کرے تو دل بدلنے میں وقت نہیں لگتا کیونکہ ایک تو سخاوت کی وجہ سے بہت حد تک انکے دل اچھے ہوتے ہیں اور دوسرا یہ کہ اللہ پاک کی مدد و نصرت سے ایک داعی کی محنت رنگ ضرور لے آتی ہے۔
اور جہاں تک بات ہے بخیل زاہد کی تو اللہ پاک کی عبادت کے لیے کیا تھوڑی مخلوقات ہیں ؟؟ کیا اللہ پاک اپنے فرشتوں سے ہی اپنی عبادت کرواتے رہتے تو وہ کم تھا ؟؟ ہمارے اسلامی عقائد و تعلیمات کے مطابق خانہ کعبہ میں روزانہ ہزاروں فرشتے حاضری دیتے ہیں اور فرشتوں کا جو گروپ ایک بار آ گیا پھر دوبارہ قیامت تک اسکا نمبر نہیں آئے گا ،، مطلب اتنے زیادہ فرشتے ہیں ۔۔ تو کیا پھر ایک بندہ جو بظاہر پرییز گار اور متقی ہونے کا دعویدار ہو اور بڑی لمبی ڈاڑھی رکھ لے یا جو بھی اسکا حلیہ ہو ،، اور چاہے اسکی پیشانی پر عبادت و سجود کی وجہ سے کتنا ہی گہرا نشان موجود ہو ،، لیکن اللہ کی مخلوق کے لیے اس کے دل میں ہمدردی اور اچھائی کا جذبہ نہ ہو تو اسکی عبادات کا کیا حاصل ؟؟ اللہ پاک کو بخیل بندہ ناپسند ہے اور احادیث میں بھی بخل سے منع فرمایا گیا ہے ۔۔ سو ایک بخیل بندہ وہ ہے جو اللہ کی مخلوق کا خیال ، دھیان اور احترام نہیں کرتا اور وہ اللہ کی مخلوق کا دوست نہیں ہوتا ۔۔ حیوان تو دور وہ انسانوں کو ہی گھاس نہیں ڈالتا ،، اور دیگر انسانوں کو بھی چھوڑیں ،، کیونکہ اس بخیل بندے کے معاملات اتنے گندے اور اتنے خراب ہوتے ہیں کہ وہ اپنے ساتھ وقت گزارنے والے قریبی لوگوں اور قریبی دوستوں کو ہی ضروری مواقع پر نظر انداز کر کے اپنے ایکسٹریم لیول کے بخل کا پکا ثبوت دیتا ہے ۔۔ تو کہاں کا زہد ، کہاں کی عبادات اور کہاں کے دکھاوے کے حلیے اور کہاں کی اسلامی وضع قطع ؟؟ بخیل کے اندر اللہ کی مخلوق سے پیار ، احترام ، لحاظ اور مدد کا جذبہ دور دور تک نہیں ہوتا ۔۔ جہاں تک بات ہے اس کی عبادات ، ذکر یا اللہ اللہ کرنے کی تو خود اللہ پاک کو یہی پسند ہے کہ اسکی مخلوق سے معاملات صحیح رکھے جائیں ۔۔
ایک مثال ۔۔ ایک بندہ جسے ہنگامی بنیاد پر انتہائی ضروری دوائیوں کے لیے دو ہزار روپے چاہییں اور جس سے اسکی یا اسکے کسی عزیز کی جان بچ سکتی ہو ،، اگر وہ بخیل بندہ باوجود استطاعت کے اس ضرورت مند کو اگنور کرے اور بس نماز روزہ اور اللہ اللہ کرتا رہے تو کیا اللہ پاک راضی ہونگے ؟؟ بیشک نماز روزے ضروری ہیں لیکن اس نے باوجود قدرت رکھنے کے اللہ کی مخلوق کو اگنور کیوں کیا ؟؟ اسی طرح جب بندہ کسی دوسرے بندے کے ساتھ زندگی کا ایک انتہائی لمبا عرصہ گزارے (چاہے وہ سکول ٹائم ہو ، کالج ٹائم یا یونیورسٹی ٹائم ،، یا کہیں بھی) اور خاص ترین موقعوں یا ایونٹس پر انھیں اگنور کر دے یا لفٹ نہ کروائے تو کیا یہ بات اللہ کے ہاں مقبول ہو گی یا انتہائی درجے کا بخل اور سنگدلی تصور کی جائے گی ؟؟ سو بجائے ایسے عابد و زاہد کی ظاہری چیزوں کے ،، اس کے باطن کا خبث اور تاریکی واضح ہو جانے پر اس سے سائڈ پر رہنا ہی ٹھیک ہے کیونکہ جو اللہ کی مخلوق کا نہیں اس کا کوئی فائدہ نہیں ،، ہاں ہدایت کی دعا ضرور کرتے رہنا چاہیے ۔۔ لیکن میرے نزدیک کسی کا دل توڑنے والا اللہ کا قرب حاصل نہیں کر سکتا اور میں اس بات پر مرتے دم تک قائم رہوں گا ان شاءاللہ ۔
میں اپنی اس چھبیس ستائیس سال کی زندگی اور پے درپے ہونے والے حالات و واقعات اور تجربات سے اسی رزلٹ پر پہنچا ہوں کہ لوگوں کی اکثریت کو معاملات کا پتا کوئی نہیں ۔۔ معاملات کے معاملے میں وہ صفر بٹا صفر ہیں اور ایک سے بڑھ کر ایک زاہد و عابد بنا ہوا ہے ۔۔ کوئی شلواریں اونچی کر کے اور کوئی ڈاڑھیاں رکھ کر اور کوئی چوبیس گھنٹے سر پر ٹوپی رکھ کر ،، اور جدید حلیے والوں کی میجورٹی کا بھی حال زیادہ تر ایسا ہی ہے ۔۔ اگرچہ سنت عمل سب سے افضل ہے لیکن کیا نبی پاک صلی اللہ علیہ وسلم نے معاملات اور اخلاقیات کی تربیت اور ان پر زور و تاکید نہیں کی تھی ؟؟ کیا نبی پاک صلی اللہ علیہ وسلم نے وعدے اور معائدے کی لاج رکھنے اور پاسداری کا حکم نہیں فرمایا تھا ؟؟
اور معذرت کے ساتھ کہ میں نے یہ بھی دیکھا ہے کہ بظاہر مذہبی ہونے کے دعویدار کچھ زیادہ ہی ڈھیٹ ، اکھڈ ، بدمزاج ، کنجوس ، بخیل ، معاملات کے گندے ہیں ۔۔ سب ایسے نہیں لیکن نام نہاد مذہبی جو بس ظاہری وضع قطع پر فوکس رکھ کر لوگوں کو الو بنائے ہوئے ہیں ۔۔ میں جتنا ڈیفینڈ مذہبی لوگوں کو کرتا ہوں اور میرے اپنے مضامین مولویوں اور اسلام پسندوں کے حق میں ہیں وہ سب جانتے ہیں ۔۔ لیکن اسکا یہ مطلب ہرگز نہیں کہ جہاں ان میں سے کسی کی کوئی ایسی ویسی بات ہو بندہ منہ پر ٹیپ لگا کر خاموش ہو جائے ۔۔
میں یہاں اپنے ساتھ پیش آنے والے سچے واقعات اگر لکھ دوں تو شائد اس سے کئی لوگوں کا نام نہاد علماء پر اعتبار ہی اٹھ جائے لیکن میں ان سب کی ہدایت کی دعا کروں گا اور ساتھ ہی ساتھ اپنی کمیوں ، کوتاہیوں اور غلطیوں پر بھی اللہ سے معافی کا خواستگار ہوں ۔۔ اللہ پاک مجھے ہمیشہ صحیح راہ پر قائم رکھیں اور دین و دنیا کی بھلائیوں اور کامیابیوں سے نوازیں اور اپنی مخلوق سے محبت کرنے والا بنائیں ۔۔ اور جتنا ممکن کو ہاتھ اور دل کھلا رکھنے والا بنائیں ،، اور بخل ، ضد ، انا ، کنجوسی ، ہٹ دھرمی اور بے شرمی سے بچائیں ۔۔ آمین
حافظ فصیح الدین محمد ناصر
2.gif "Smile::")
Reply With Quote
Rana268 said:
Bookmarks