Dunya Apney Chahney Waley Ke Saath Kya Karti Hai - Must Read

**Fasih ud Din** · 26th July 2017, 12:08 AM

دنیا اپنے چاھنے والے کے ساتھ کیا کرتی ھے ؟؟؟

حضرت عیسیٰؑ اپنے ایک شاگرد کو ساتھ لے کر کسی سفر پر نکلے،راستے میں ایک جگہ رکے اور شاگرد سے پوچھا کہ تمہاری جیب میں کچھ ہے؟
اس نے کہا:میرے پاس دو درہم ہیں۔
حضرت عیسیؑ نے اپنی جیب سے ایک درہم نکال کر اسے دیا اور فرمایا:یہ تین درہم ہوجائیں گے،قریب ہی آبادی ہے ،تم وہاں سے تین درہموں کی روٹیاں لے آئو۔
وہ گیا اور تین روٹیاں لیں،راستے میں سوچنے لگا کہ حضرت عیسیٰؑ نے تو ایک درہم دیا تھا اور دو درہم میرے تھے جبکہ روٹیاں تین ہیں،ان میں سے آدھی روٹیاں حضرت عیسیٰؑ کھائیں گے اور آدھی روٹیاں مجھے ملیں گی،لہٰذا بہتر ہے کہ میں ایک روٹی پہلے ہی کھال لوں،چنانچہ اس نے راستے میں ایک روٹی کھالی اور دو روٹیاں لے کر حضرت عیسیٰؑ کے پاس پہنچا۔
آپ نے ایک روٹی کھالی اور اس سے پوچھا:تین درہم کی کتنی روٹیاں ملی تھیں؟
اس نے کہا:دو روٹیاں ملی تھیں،ایک آپ نے کھائی اور ایک میں نے کھائی۔
حضرت عیسیٰؑ وہاں سے روانہ ہوئے،راستے میں ایک دریا آیا،شاگرد نے حیران ہو کر پوچھا:اے اللہ کے نبی!ہم دریا عبور کیسے کریں گے جبکہ یہاں تو کوئی کشتی نظر نہیں آتی؟
حضرت عیسیٰؑ نے فرمایا:گھبرائو مت،میں آگے چلوں گا تم میری عبا کا دامن پکڑ کر میرے پیچھے چلتے آئو،خدا نے چاہا تو ہم دریا پار کرلیں گے۔
چنانچہ حضرت عیسیٰؑ نے دریا میں قدم رکھا اور شاگرد نے بھی ان کا دامن تھام لیا،خدا کے اذن سے آپ نے دریا کو اس طرح پار کر لیا کہ آپ کے پائوں بھی گیلے نہ ہوئے۔
شاگرد نے یہ دیکھ کر کہا:میری ہزاروں جانیں آپ پر قربان!آپ جیسا صاحب اعجاز
نبی تو پہلے مبعوث ہی نہیں ہوا۔
آپ نے فرمایا:یہ معجزہ دیکھ کر تمہارے ایمان میں کچھ اضافہ ہوا؟
اس نے کہا:جی ہاں!میرا دل نور سے بھر گیا،پھر آپ نے فرمایا:اگر تمہارا دل نورانی ہوچکا ہے تو بتائو روٹیاں کتنی تھیں؟
اس نے کہا :حضرت روٹیاں بس دو ہی تھیں۔
پھر آپ وہاں سے چلے،راستے میں ہرنوں کا ایک غول گزر رہا تھا،آپ نے ایک ہرن کو اشارہ کیا ،وہ آپ کے پاس چلا آیا،آپ نے ذبح کر کے اس کا گوشت کھایا اور شاگرد کو بھی کھلایا۔
جب دونوں گوشت کھا چکے تو حضرت عیسیٰؑ نے اس کی کھال پر ٹھوکر مار کر کہا:’’‘‘ اللہ کے حکم سے زندہ ہو جا۔
ہرن زندہ ہوگیا اور چوکڑیاں بھرتا ہوا دوسرے ہرنوں سے جا ملا۔
شاگرد یہ معجزہ دیکھ کر حیران ہوگیا او رکہنے لگا:اللہ کا شکر ہے جس نے مجھے آپ جیسا نبی اور معلم عنایت فرمایا ہے۔
حضرت عیسیٰؑ نے فرمایا:یہ معجزہ دیکھ کر تمہارے ایمان میںکچھ اضافہ ہوا؟
شاگرد نے کہا:اے اللہ کے نبی!میرا ایمان پہلے سے دوگنا ہو چکا ہے۔
آپ نے فرمایا:پھر بتائو کہ روٹیاں کتنی تھیں؟
شاگرد نے کہا :حضرت روٹیاں دو ہی تھیں۔
دونوں راستہ چلے گئے،ایک پہاڑی کے دامن میں سونے کی تین اینٹیں پڑی تھیں ،
آپ نے فرمایا:ایک اینٹ میری ہے اور ایک اینٹ تمہاری ہے اور تیسری اینٹ اس شخص کی ہے جس نے تیسری روٹی کھائی۔
یہ سن کر شاگرد شرمندگی سے بولا:حضرت تیسری روٹی میں نے ہی کھائی تھی۔
حضرت عیسی نے اس لالچی شاگرد کو چھوڑ دیا اور فرمایا:تینوں اینٹیں تم لے جائو، یہ کہہ کر حضرت عیسی وہاں سے روانہ ہوگئے اور لالچی شاگرد اینٹوں کے قریب بیٹھ کر سوچنے لگا کہ انہیں کیسے گھر لے جائے۔
اسی دوران تین ڈاکو وہاں سے گزرے انہوں نے دیکھا،ایک شخص کے پاس سونے کی تین اینٹیں ہیں،انہوں نے اسے قتل کردیا اور آپس میں کہنے لگے کہ اینٹیں تین ہیں اور ہم بھی تین ہیں،لہٰذا ہر شخص کے حصے میں ایک ایک اینٹ آتی ہے،اتفاق سے وہ بھوکے تھے،انہوں نے ایک ساتھی کو پیسے دئیے اور کہا کہ شہر قریب ہے تم وہاں سے روٹیاں لے آئو،اس کےبعد ہم اپنا اپنا حصہ اٹھالیں گے،وہ شخص روٹیاں لینے گیا اور دل میں سوچنے لگا اگر میں روٹیوں میں زہر ملا دوں تو دونوں ساتھ مرجائیں گےاور تینوں اینٹیں میری ہوجائیں گی،ادھر اس کے دونوں ساتھوں نے آپس میں مشورہ کیا کہ اگر ہم اپنے اس ساتھی کو قتل کردیں تو ہمارے میں حصہ میں سونے کی ڈیڑھ ڈیڑھ اینٹ آئے گی۔
جب ان کا تیسرا ساتھ زہر آلود روٹیاں لے کر آیا تو ان دونوں نے منصوبہ کے مطابق اس پر حملہ کر کے اسے قتل کردیا،پھر جب انہوں نے روٹی کھائی تو وہ دونوں بھی زہر کی وجہ سے مرگئے،واپسی پر حضرت عیسیٰؑ وہاں سے گزرے تو دیکھا کہ اینٹیں ویسی کی ویسی
رکھی ہیں جبکہ ان کے پاس چار لاشیں بھی پڑی ہیں،آپ نے یہ دیکھ کر ٹھنڈی سانس بھر ی اور فرمایا:’’‘‘دنیا اپنی چاہنے والوں کے ساتھ یہی سلوک کرتی ہے۔
(انوار نعمانیہ ص۳۵۳)