گرم مصالحہ
بازار میں عموما جو پیکٹ کے گرم مصالحہ پاؤڈر ملتا ہے اس کا ذائقہ اور خوشبو گھر میں پسے ہوئے گرم مصالحے سے قطعی مختلف ہوتی ہے ۔اسی وجہ سے کھانوں کے ذائقوں میں بھی فرق آجاتا ہے۔ مجھے بھی مصروفیت کی وجہ سے اتفاق ہوا پیکٹ کا گرم مصالحہ خرید کر استعمال کرنے کا جس کی وجہ سے کھانوں کا ذائقہ ہی کچھ سے کچھ ہو گیا ۔اسی لیے میں نے سوچا کے گھر کے گرم مصالحہ کی ترکیب بھی شئیر کرلوں ۔گھر میں گرم مصالحہ پیسنے کے لیے مندرجہ ذیل اجزاء درکار ہونگے ۔
لونگ ؛؛؛؛؛؛ ٢٥ گرام
کالی مرچ؛؛؛؛؛٢٥ گرام
بڑی الائچی؛؛؛٥٠ گرام ((گرم پتیلی کے ڈھکن پر رکھ کر تھوڑا خشک ہونے دیں پھر چھلکے اور دانے الگ کرلیں)
دارچینی ؛؛؛؛؛؛٢٥ گرام ((چھوٹے ٹکڑے ہاتھ سے کرلیں ))
زیرہ ؛؛؛؛؛؛آدھا پاؤ
تیز پتہ؛؛؛؛؛؛ایک یا دو درمیانےسائز کے پتے
چھوٹی الائچی؛؛؛؛تین سے چار
ان سب چیزوں کو ایک پرات میں جمع کر لیں اور کرائنڈر کے ساتھ جو مل آتی ہے اس میں پیس لیں ۔بہترین خوشبو دار پسا گرم مصالحہ تیار ہوگا ۔جس سے آپ کے کھانوں کا ذائقہ بھی بڑھ جائے گا ۔
چٹکیاں
یہاں کچھ کھانوں کو جلدی تیار کرنے اور کچھ کھانوں کی key tips لکھی جائنگی ۔
بریانی
گوشت کو نمک ، مرچ ، پسا دھنیہ ، ادرک لہسن پیسٹ کے ساتھ گلا لیں اور پانی خشک کرلیں۔اب دہی میں پسا گرم مصالحہ،پسی ہوئی سبز الائچی ملا کر گوشت میں ڈال دیں اور ڈھکن ڈھک دیں ۔براؤن کی ہوئی پیاز شامل کرکے ۔
ابلے ہوئے چاولوں کی ایک تہہ پتیلی میں لگایئں اور گوشت کی ایک تہہ اس پر لگا کر ہرا دھنیہ تھوڑا سا اور چند ہری مرچیں ڈال دیں ۔اسکے اوپر ایک اور تہہ چاولوں کی دیں اور زردے کا رنگ چاولوں پر ڈال کر پتیلی کا ڈھکن ڈھک دیں ۔پانچ منٹ کے بعد دیکھیں اگر بھاپ بن گئی ہے تو چولھا بند کردیں ۔چاول اسی بھاپ میں دم ہو جائنگے ۔
اگر سندھی بریانی بنانی ہے تو چھے سات آلو بخارے کو پانی میں بھگو دیں۔دو یا تین آلو کاٹ کر ابال لیں اور پھر انہیں تیل میں تل کر نکال لیں۔گوشت میں آلو بخارے اور آلو ملا کر پھر چاولوں کی تہہ لگا کر اس پر پودینہ چھڑک کر دم دے دیں ۔مزیدار سندھی بریانی تیار ہوگی۔
فرنچ فرائز
آلو چھیل کر کاٹ لیں یا اگر فرائز کٹ کرنے کی مشین ہے تو اس میں کاٹ لیں ۔
ایک پتیلی میں پانی میں نمک ڈال کر ابالنے رکھ دیں ۔
پانی ابلنے لگے تو اس میں فرائز ڈال کر تین سے پانچ منٹ ابالیں ۔(نئے آلو تین منٹ ،پرانے پانچ منٹ تک)
اب ان کو نتھار لیں اور فریز کر دیں ۔یا اگر فورا تلنے ہیں تب بھی تھوڑی دیر کے لیے فریزر میں رکھ کر تلیں ۔مزیدار فرائز گھر پر ہی تیار ہو جاینگے۔
قورمہ
گوشت کو نمک ،مرچ، پیاز ،ادرک ، لہسن اور پسے دھنیے کے ساتھ گلا لیں ۔پانی خشک ہونے پر دہی کے ساتھ بھون لیں ۔ تھوڑی سے جاوتری پسی ہوئی ،تھوڑی جائنفل پسی ہوئی ،سبز الائچی پسی ہوئی اور گرم مصالحہ ڈال کر چولھا بند کر دیں۔کچھ دیر میں پتیلی کو کھول کر ان سب چیزوں کو مکس کرکے آدھا ٹیبل اسپون عرق گلاب ڈال دیں۔
کوئیک کوکنگ ٹپس
اگر آپ ورکنگ پرسن ہیں اور کھانا آپ کو خود بنانا پڑتا ہے یا پھر گھر میں افراد یا دعوت کا اہتمام زیادہ ہوتا ہے تو درج ذیل ٹپس آپ کے بہت کام آسکتی ہیں۔
کھانا بنانے کے لیے پیاز کاٹتے ہوئے ایک یا دو پیاز روز زیادہ کاٹ کر فریز کر دیں ۔اس طرح آپ کے پاس کٹی ہوئی پیاز کا اسٹاک ہو جائے گا اور اچانک آنے والے مہمانوں کے بعد کم از کم ایک اضافی کام نہیں کرنا پڑے گا۔
پیاز براؤن کرتے ہوئے کچھ پیاز اضافی براؤن کرلیں اور اسکو فریز کردیں ۔ٹیسٹ پر بلکل اثر نہیں پڑتا ہے ۔
یا پھر ویک اینڈ پر کوشش کرکے دونوں کام ایک ساتھ کرلیں یعنی پیاز چھیل ،کتر کر براؤن کرکے فریز کرلیں تاکہ آنے والے دنوں میں کام کا بوجھ کچھ ہلکا رہے ۔ساتھ کے ساتھ کرنے میں فائدہ یہ ہوتا ہے کہ اضافی وقت نہیں لگانا پڑتا ہے ۔چوائس از یورز ۔
لہسن ،ادرک پیس کر رکھنے سے کبھی ہرا بھی ہو جاتا ہے اسکے لئے بہترین ٹپ یہ ہے کہ اسے ایئر ٹائٹ کانچ کے جار میں پیسنے کے بعد رکھ کر فریز کر دیں اور پھر نکال کر استعمال کریں ۔ادرک اگر لہسن کے ساتھ تھوڑی زیادہ پیس لی جائے تب بھی لہسن ہرا نہیں ہوتا ہے۔
گوشت جب لائیں تو اسے ایک ساتھ گلا لیں ۔آٹھ پونڈ کے ککر میں تقریبا پونے چار کلو گوشت مصالحے سمیت آجاتا ہے ۔گوشت کو نمک ،مرچ ، ہلدی اور ادرک لہسن کے ساتھ گلا اس کے حصے بنا کر رکھ لیں ۔اور جب پکانا ہو یا اچانک مہمان آجایئں تو اسے ڈی فروسٹ کرکے یا پتیلی میں ہی گرم کرکے براؤن پیاز ،دہی ڈال کر سالن تیار کرلیں۔اگر کوئی سبزی شامل کرنا چاہیے تو وہ بھی کر سکتے ہیں۔
ہرے دھنیہ کو اگر فریج میں بھی دو دن سے زیادہ رکھو تو مرجھا جاتا ہے اور خوشبو بھی کم ہو جاتی ہے ۔ ہرئے دھنیے کو توڑ اور کاٹ کر پانی میں بھگو دیں ۔پانچ منٹ کے بعد اسے نتار کر ایک پلاسٹک کنٹینر میں رکھ کر ڈھکن لگا کر فریزر میں رکھ دیں اور جب چاہیں استعمال کریں ۔یہی طریقہ پالک اور دیگر ساگ اور پودینہ کے ساتھ بھی اختیار کیا جا سکتا ہے ۔
سفید اور کالے چنے ایک ساتھ ابال کر پورشنز بنا کر فریز کردیں اور حسب ضرورت استعمال کریں ۔
پلاؤ کی یخنی تیار کرکے ، براؤن پیاز ،ثابت گرم مصالحہ ،دہی ،سبز الائچی اور پسے گرم مصالحے کے ساتھ بگھار کر فریز کرلیں۔ جب پلاؤ دم دینا ہو تو چاول بھگو دیں ،اتنی دیر میں یخنی کو پتیلی میں چولھے پر رکھ دیں اور مطلوبہ مقدار میں پانی ڈال کر چاولوں کو دم دے دیں ۔
Bookmarks