`*`*`* Roman Choice `*`*`*`

[Shaheen]

ik Gazal us pe likhuu.N dil kaa takaazaa hai bahut
in dinon Khud se bichhar jaane kaa dharakaa hai bahut

raat ho din ho Gafalat ho ki bedaarii ho
usko dekhaa to nahiin hai use sochaa hai bahut

tashnagii ke bhii muqaamaat hain kyaa kyaa yaanii
kabhii dariyaa nahiin kaafii, kabhii qatraa hai bahut

mere haathon kii lakiiron ke izaafe hain gavaah
main ne patthar kii tarah Khud ko taraashaa hai bahut

[Shaheen]

aaj to be-sabab udaas hai jii
ishq hotaa to ko_ii baat bhii thii

jaltaa phirtaa huuN kyuuN do-paharon mein
jaane kyaa chiiz kho ga_ii merii

vahiin phirtaa huuN main bhii Khaak ba-sar
is bhare shahar mein hai ek galii

chhupataa phirtaa hai ishq duniyaa se
phailatii jaa rahii hai rusvaaii

ham_nashiin kyaa kahuuN ke vo kyaa hai
chhor ye baat neend urane lagii

aaj to vo bhii kuchh Khaamosh saa thaa
main ne bhii us se ko_ii baat na kii

ek dam us ke haath chuum liye
ye mujhe baiThe baiThe kyaa suujhii

[Shaheen]

apanii rusvaaii,,,, tere naam ka charchaa dekhuuN
ek zaraa sher kahuuN aur main kyaa kyaa dekhuuN

niind aa jaaye to kyaa mahafilen barpaa dekhuuN
aaNkh khul jaaye to tanhaaii kaa sehra dekhuuN

shaam bhii ho gaii dhundhlaa gaii aaNkhen bhii merii
bhoolne vaale main kab tak teraa rastaa dekhuuN

sab ziden us kii main puurii karuuN har baat sunuuN
ek bachche kii tarah se use haNstaa dekhuuN

mujh pe chhaa jaaye vo barasaat kii Khushbuu kii tarah
ang ang apnaa usii rut mein mehektaa dekhuuN

tuu merii tarah se yaktaa hai magar mere habib
jii men aataa hai koii aur bhii tujh saa dekhuuN

main ne jis lamhe ko puujaa hai use bas ek baar
Khvaab ban kar terii aaNkhon mein utartaa dekhuuN

tuu meraa kuchh nahiin lagtaa hai magar jaan-e-hayaat
jaane kyon tere liye dil ko dharaktaa dekhuuN

[Shaheen]

baadalon kaa kaafilaa aataa huaa achchhaa lagaa
pyaas kii dharatii ko har saavan baraa achchhaa lagaa

us bharii mahafil mein us kaa chand lamhon ke liye
mujh se milanaa baat karanaa dekhanaa achchhaa lagaa

jin kaa sach honaa kisii suurat se bhii mumkin na thaa
aisii aisii baaten aksar sochnaa achchhaa lagaa

vo to kyaa aataa magar Khush_fahamiyon ke saath saath
saarii saarii raat ham ko jaagnaa achchhaa lagaa

pahale pahale to nigaahon mein koii jachtaa na thaa
raftaa raftaa duusraa phir tiisraa achchhaa lagaa

[Shaheen]

chaaNdnii raat mein chaaNd ke saamne
ruKh se pardaa haTaanaa Gazab ho gayaa
chaaNdanii chhup ga_ii chaaNd sharmaa gayaa
aap kaa muskuraanaa Gazab ho gayaa

dil kii dharkan merii tez hone lagii
raat aaNkhon mein kaaNTen chubhone lagii
vasl kii raat mein baat hii baat mein
yuuN teraa ruuTh jaanaa Gazab ho gayaa


jhuum kar kaalii kaalii ghaTaa jab uThii
raat apanii to karavaT badlate kaTii
kuchh to mausam ne bechain rakkhaa hame.n
kuchh teraa yaad aanaa Gazab ho gayaa

apane hisse mein tuufaaN kii taqadiir thii
zindagii apanii maujon kii zanjiir thii
Duub jaane kaa apne hamen Gam na thaa
us kaa saahil pe aanaa Gazab ho gayaa

[Shaheen]

maharabaaN ho ke bulaa lo mujhe chaaho jis waqt
main gayaa waqt nahiin huuN ke phir aa bhii na sakuuN

zauf mein taanaa-e-aGayaar kaa shikvaa kyaa hai
baat kuchh sar to nahiin hai ke uThaa bhii na sakuuN


zehar miltaa hii nahiin mujhako sitam_gar varnaa
kyaa qasam hai tere milne kii ke khaa bhii na sakuuN

[Shaheen]

aaj ham bichhre hain to kitane rangiile ho gaye
merii aaNkhen surKh tere haath piile ho gaye

kab kii patthar ho chukii thii muntazir aaNkhen magar
chhuu ke dekhaa to,,,, mere haath giile ho gaye

[Shaheen]

kis kis ki main pyass bujhaaon
kis kis ke mai kaam aaon
soach raha hai jane kya kya
pehla qatra baarish ka

[Shaheen]

Mana teri nazar mein tera pyaar hum nahi,
kaise kahen ki tere talabgaar hum nahi,

Khud ko jala ke khak kar dala, mita diya,
lo ab tumhari raah mein dewaar hum nahi,

Jis ko sanwara humne tamannaon ke khoon se,
gulshan mein us bahar ke haqdaar hum nahi,

Dhokha diya hai khud ko muhobbat ke naam se,
kaise kahen ki tere gunahgaar hum nahi.....

[Shaheen]

dil kaa kyaa hai vo to chaahegaa musal_sal milnaa
vo sitam_gar bhii magar soche kisii pal milnaa

vaaN nahiin vaqt to ham bhii hain adiim-ul-fursat
us se kyaa kahiye jo har roz kahe,,, kal milnaa

[Shaheen]

dil ko us raah pe chalna hi nahi
jo mujhe tujh se juda karti hai

zindagi meri thee lekin ab to
tere kehne mai raha karti hai

[Shaheen]

ujre hue loagon se gurezaan na hua kar
haalaat ki qabron pe ye qatbe bhi parha kar.

har waqt ka hansna tujhe barbaad na kar de
tanhaaee ke lamhon mai kabhi ro bhi liya kar,

ae dil tujhe dushman ki bhi pehchan kahan hai.
too halqa e yaaran mai bhi mohtaat raha kar.

us shakhs ke tum se bhi marasim hain to hoonge
woh jhoot na bole ga mere saamne aa kar.

ab thookre khaye ga kahan ae game ahbaab
main to kaha tha mere dil mai hi raha kar.

is shab ke muqaddar main seher hi nahi Mohsin
dekha hai kayee baar chiragon ko bujha kar