ورلڈ کپ 2011: بھارت نے ہالینڈ کو 5 وکٹوں سے شکست دے دی
ورلڈ کپ میں گروپ بی کے میچ میں ہالینڈ نے بھارت کے خلاف ٹاس جیت کر پہلے بیٹنگ کرتے ہوئے بھارت کو جیتنے کیلئے 190 رنز کا ہدف دیا جو بھارت نے چھتیس اعشاریہ تین اوورز میں 5 وکٹوں نے نقصان پر پورا کر لیا۔ ہالینڈ کی جانب سے پیٹر سیلار نے تین کھلاڑیوں کو پویلین کی راہ دکھائی۔
بھارتی بلے بازوں نے اپنی اننگز کے آغاز سے ہی میچ پر گرفت مضبوط رکھنے کی کوشش شروع کر دی، بھارت کو پہلا نقصان 69 کے ٹوٹل پر اٹھانا پڑا جب وریندر سہواگ سیلار کی گیند پر کرویزی کے ہاتھوں کیچ آؤٹ ہو کر پویلین واپس لوٹ گئے۔ ان کے بعد ماسٹر بلاسٹر سچن ٹنڈولکر بھی زیادہ دیر تک وکٹ پر نہ ٹک سکے اور 27 رنز بنا کر سیلار کے ہاتھوں وکٹ گنوا بیٹھے۔ یوسف پٹھان بھی 11 رنز بنا کر سیلار کا شکار بن گئے۔ گوتم گمبھیر ٹوٹل میں 28 رنز کا اضافہ کر کے مدثر بخاری کے ہاتھوں آؤٹ ہو کر پویلین لوٹ گئے۔ ورات کوہلی کو 12 کے انفرادی سکور پر بورن نے بولڈ کر دیا۔ یووراج سنگھ نے 51 رنز کی ناقابل شکست اننگز کھیلی۔
اس سے قبل ہالینڈ کی اننگز میں بھارتی باؤلرز نے میچ کے آغاز سے ہی ہالینڈ کے بلے بازوں پر دباؤ برقرار رکھا۔ ایرک شوازسزنسکی 28 رنز بنا کر چاولہ کے ہاتھوں بولڈ ہوئے، 26 کے سکور پر ہالینڈ کو دوسرا نقصان ویسلی بریسی کی شکل میں اٹھانا پڑا، انہیں یووراج سنگھ نے ایل بی ڈبلیو آؤٹ کیا۔ 11 کے انفرادی سکور پر ریان ٹین ڈوئچے یووراج سنگھ کی گیند پر ظہیر خان کے ہاتھوں کیچ آؤٹ ہو کر پویلین لوٹ گئے۔ ہالینڈ کی چوتھی وکٹ ٹم کوپر کی تھی جو اشیش نہرا کی گیند پر دھونی کے ہاتھوں کیچ آؤٹ ہوئے۔ الیکسی کرویزی چاولہ کے آگے نہ ٹھہر سکے اور 11 رنز پر وکٹ گنوا بیٹھے۔ پیٹر بورن کے 38 رنز کے علاوہ ہالینڈ کا کوئی بھی بلے باز زیادہ مزاحمت نہ کر سکا اور پوری ٹیم چھیالیس اعشاریہ چار اوورز میں 189 رنز بنا کر پویلین واپس لوٹ گئی۔
بھارتی ٹیم کی جانب سے ظہیر خان نے تین جبکہ یوراج سنگھ اور چاولہ نے دو دو وکٹیں حاصل کیں۔ نئی دہلی کے فیروز شاہ کوٹلہ کرکٹ اسٹیڈیم میں ہونے والے میچ سے قبل میگا ایونٹ میں دونوں ٹیمیں صرف ایک بار آمنے سامنے ہوئیں۔2003 کے ورلڈ کپ میں بھارت کو ہالینڈ کیخلاف کامیابی حاصل ہوئی تھی۔
Bookmarks