دوسراون ڈے انٹرنیشنل: پاکستان نے آسٹریلیا کو 7وکٹوں سے ہرادیا
ابو ظہبی…پاکستان نے دوسرے ون ڈے میں آسٹریلیا کو 7وکٹوں سے شکست دے کر سیریز برابر کردی ۔پاکستان اور آسٹریلیا کے درمیان ابوظہبی کے شیخ زید اسٹیڈیم میں کھیلے گئے دوسرے ایک روزہ انٹرنیشنل میچ میں آسٹریلیا نے پہلے بیٹنگ کرتے ہوئے پاکستان کو جیت کے لیے مقررہ 50 اوورز میں249رنز کا ہدف دیا جسے پاکستان نے پورا کرکے آسٹریلیا کو 7وکٹوں سے شکست دے کر سیریز برابر کردی۔پاکستان کی جانب سے اوپنرزنے شاندار کھیل کا مظاہرہ کیا ۔ناصر جمشید نے 11 چوکوں اور2 چھکوں کی مدد سے97 رنز کی شاندار اننگزکھیلی ۔محمد حفیظ نے33 جبکہ اسد شفیق نے 9 رنز اسکور کیے۔ اظہر علی نے بھی شاندار کھیل کا مظاہر ہ کیا اور 59رنز اسکور کیے،جبکہ مصباح الحق نے 35رنز اسکو ر کیے اور دونوں ناٹ آؤٹ رہے۔آسٹریلیا کی جانب سے اسٹار بیٹسمین مائیکل ہسی نے61 رنز بنائے،ان کے علاوہ کپتان کلارک 37،بیلی39،میکس ویل 28اور وارنر 24دیگر قابل ذکر بیٹسمین تھے۔پاکستان کی جانب سے جادو گر اسپنر سعید اجمل نے آج شاندار بالنگ پرفارمنس کا مظاہرہ کیااور کینگروز کو حقیقتاً بڑا مجموعہ ترتیب دینے سے کسی حد تک باز رکھا۔انکے علاوہ جنید خان نے تین جبکہ محمد حفیظ اور عبدالرحمن نے ایک ایک وکٹ اپنے نام کی۔آسٹریلیا کی جانب سے کرسٹن ، جونسن اور پیٹنسن نے ایک ایک وکٹ حاصل کی ۔
ابوظہبی ،ناصر جمشید نے آسٹریلیا کے خلاف خود کو میچ ونر ثابت کردیا
ابوظہبی… آسٹریلیا کے خلاف عام طور پر پاکستان ٹیم دباؤ میں دکھائی دیتی ہے لیکن اس پریشر کو ناصر جمشید نے دلکش اور میچ وننگ اننگ کھیل کر توڑ دیا، اور خود کو بڑی ٹیم کے خلادف پرفارم کرنے والا میچ ونر بھی ثابت کیا۔ ناصر جمشید 97 رنز کی میچ وننگ کھیل کر پویلین کی جانب روانہ ہوئے تو دیکھا جا سکتا ہے کہ انہوں نے مسلز پل ہونے کے باوجود بہادری سے آسٹریلیوی بولنگ اٹیک کا مظاہرہ کیا۔امارات کی گرمی ان کے کریمپ کی وجہ دکھائی دیتی ہے کیونکہ شدید حبس اور گرمی میں پسینہ جب نہ رکے تو طویل اننگ کھیلنے والے کھلاڑی کو کریمپ پڑنا معمول کی بات ہے۔ 21 جنوری 2008 کو کراچی میں زمبابوے کے خلاف ڈیبیو کرنے والے ناصر جمشید کے کیرئیر پر نگاہ ڈالی جائے تو کبھی ان کبھی آؤٹ۔ سری لنکا کے خلاف سیریز میں ان کا انتخاب کیا گیا تھا، وجہ تھی ناصر کی ڈومیسٹک سیزن میں بدستور شاندار کارکردگی اور بالخصوص بنگلہ دیش پریمئیر لیگ میں ان کی غیر معمولی پرفارمنس لیکن سیریز کے آغاز سے قبل ان فٹ ہونے کی وجہ سے وہ سری لنکا نہ جا سکے۔ سلیکٹرز نے آسٹریلیا کے خلاف موقع دیا تو انہوں نے ملک کے کروڑو شائقین کو مایوس نہیں کیا۔پہلے ون ڈے میں شکست اور دوسرے ایک روزہ میچ کا ٹاس ہارنے کے بعد پاکستان ٹیم دباؤ میں تھی، لیکن ناصر جمشید نے شاندار اننگ کھیل کر سارا دباؤ ختم کر دیا۔6 دسمبر 1989 کو لاہور میں پیدا ہونے والے ناصر جمشید پاکستان کی جانب سے 17 ایک روزہ میچوں میں 666 رنز ایک سنچری اور چھ نصف سنچریوں کی مدد سے بنا چکے ہیں۔جس طرح کی بیٹنگ انہوں نے آسٹریلیا کے خلاف ابو ظہبی کے ایک روزہ میچ میں کی کھیل کی دیوانی پاکستانی قوم کو آنے والے میچز میں ان سے مزید توقعات بڑھ گئی ہیں۔ ویل پلیڈ اینڈ کیپ اٹ اپ ناصر۔
Bookmarks