کجھ زنانیاں نوں امریکہ ایس لئی زہر لگدا اے پئی ایتھے اوہناں نوں کوئی چھیڑدا ای نہیں ۔ اوہناں دے خیال وچ اوہناں دے ایتھے زنانی دی کوئی اہمیت ہی نہیں صرف اہمیت دا گویڑ لاون لئی اوہ پاکستان دا پھیرا لاوندیاں نیں تے پورا پورا خراج تحسین تے دل دا سکون پاوندیاں نیں۔ جے اہمیت دا گویڑ لاونا ہووے تے چاند رات دی خریداری وچ لایا جا سکدا ہے۔ چوڑی چڑھاون والا اودوں تیکر ہتھ گھٹدا رہندا ہے جدوں تیکر چوڑی پولی نہ ہو جاوے۔ کپڑا ویچن والا انج تھان کھول کے زنانیاں تے سٹ دا اے پئی تھان دے تھلوں ہتھ پہلے تے کپڑا مگروں اپڑدا ہے۔ درزی دی عید تے کئی دن پہلوں ہی شروع ہوجاندی اے۔ انچی ٹیپ نال جسم دا انچ انچ انج ناپ دا اے جیویں جیوجیکل سروے کررہیا ہووے۔ جُتیاں دی ہٹی تے پیراں وچ جُتی پائی گھٹ جاندی اے، تے پیر نوں بوہتا ہتھاں وچ لیا جاندا اے ۔ جیویں پیراں وچ جنت لبھی جارہی ہووے۔ لہور وچ انار کلی تے کراچی وچ لالو کھیت دیاں تنگ گلیاں چاند رات نوں ہور سونگڑ جاندیاں نیں تے اہناں گلیاں وچ رنگ برنگیاں تتلیاں ایدھروں اودھر اڈ دیاں پھر دیاں نیں۔ عید بچت بازار لگدے نیں پر سوادی گل ایہہ وے پئی اہناں بچت بازاراں وچوں کوئی بچ کے نہیں لنگھ سکدا جیہڑا لنگھ گیا سمجھو۔۔۔۔۔۔۔۔۔ توں لنگھ گیا۔
Bookmarks