جنوبی ایشیا پر خاص توجہ ہے، امریکہ
واشنگٹن : امریکا نے کہا ہے کہ اس نے پاکستان اور بھارت سے ان کے دو طرفہ تعلقات پر بات کی ہے ،اور وہ دونوں ملکوں کے درمیان مستحکم تعلقات کے لئے مذاکرات کی حوصلہ افزائی کرتا ہے ۔ یہ بات امریکی محکمہ خارجہ کے پبلک افیئرز کے اسسٹنٹ سیکرٹری فلپ جے کرالی نے واشنگٹن میں پریس بریفنگ کے دوران ایک سوال پر بتائی ۔ انہوں نے کہا امریکا نے پاکستان اور بھارت کے ساتھ اس بات پر بھی تبادلہ خیال کیا ہے کہ ان کے تعلقات دونوں ملکوں کو درپیش چیلنجز پر قابو پانے کی صلاحیت پر کس طرح اثر انداز ہورہے ہیں ۔فلپ کرالی نے کہا کہ امریکا پاکستان اور بھارت کے درمیان مستحکم تعلقات کی اہمیت کو سمجھتا ہے اور پاک افغان سرحد کی اہمیت سے بھی آگاہ ہے ۔اس کی خواہش ہے کہ تینوں ملک تعمیری طور پر مل کر کام کریں ۔ فلپ کرالی نے کہاکہ امریکا نے جنوبی ایشیا کے خطے پر توجہ مرکوز کررکھی ہے اور وہ افغانستان ، پاکستان ، بھارت اور ان کے درمیان رابطوں کی اہمیت سے بخوبی آگاہ ہے ۔ ان تینوں ملکوں کے اٹوٹ رابطوں اور اہم کردار کے بغیر نہ صرف جنوبی ایشیا بلکہ وسطی ایشیا میں امن و استحکام نہیں آسکتا ۔ یہ بھی امریکا کے اسٹریٹجک فوکس میں تبدیلی کی ایک وجہ ہے جس کے تحت ان ملکوں کو تنہا نہیں چھوڑا جاسکتا۔
****************
Bookmarks