اسلام آباد…وزیر اعظم سید یو سف رضا گیلانی نے کہا ہے کہ امریکا پاکستان کے بغیر افغان جنگ نہیں جیت سکتا ،بھارت سے ڈیل کر کرکے پاکستان پر پابندیوں کا رویہ قبول نہیں کیا جائے گا ، انہوں نے یہ بات قومی اسمبلی میں اپنے خطاب کے دوران کہی ۔انہوں نے کہا پاکستان کے امریکا سے 60سال سے تعلقات ہیں تاہمپاکستان اور امریکا کے مابین اعتماد کا فقدان ضرور ہے۔ان کا کہنا ہے کہ امریکا کو بتاچکے ہیں کہ ڈرون حملوں سے قبائلی انتہا پسندی کی جانب راغب ہو جاتے ہیں اس طرح کے حملوں سے قبائلی اور انتہا پسند ایک ہو جاتے ہیں ۔دنیا بھر نے کہا کہ ڈروں حملوں سے منفی جذبات ابھر رہے ہیں،امریکا کو ڈرون حملوں کے معاملے پر قائل کرنے کی کوشش کر رہے ہیں ۔امریکا پر یہ بھی واضح کردیا ہے اورمسلسل کہہ رہے ہیں پاکستان کو امداد نہیں تجارت چاہئے۔ملکی سا لمیت کیخلاف کسی سے تعلقات نہیں چاہتے عالمی طاقتوں کے سات برابری کی سطح پر تعلقات چاہتے ہیں۔امریکا کو ہر موقع پر پاکستان اور پاکستانیوں کی تشویش سے آگاہ کرتے رہے ہیں۔ امریکی دورے میں2درجن سے زائد پارلیمینٹرین کو قائل کیا تھا اور ماضی میں بھی میں نے براؤن ترمیم کی منظوری میں اہم کردار اد اکیا اور پریسلر ترمیم کو ختم کرایا اور اسی بدولت امریکاپاکستان سے ڈو مور کے بجائے اسٹریٹجک پارٹنر شپ کی بات کرتاہے۔ عافیہ صدیقی کے حوالے سے بھی پاکستانیوں کی تشویش سے آگاہ کر چکے ہیں اور امریکا سے کہا کہ آپ ڈاکٹر عافیہ صدیقی کو چھوڑ دیں آپ کی پاکستان میں واہ واہ ہوجائیگی۔انہوں نے کہا کہ عافیہ صدیقی کیلئے وکیل کا بند و بست بھی کردیا گیاہے۔
Bookmarks