میک اپ بالڑیاں لئی چنگا نہیں ہوندا
امریکا دے اک نجی ادارے ولوں کیتی گئی کھوج وچ ایہہ پتہ لگا ہے پئی بالڑیاں لئی میک اپ کرنا بڑا خطرناک ہو سکدا ہے۔ سیانیاں دا آکھنا ہے پئی شنگھار لئی ورتیاں جان والیاں شیواں جیویں مسکارا، آئی شیڈ تے فاؤنڈیشن وغیرہ وچ پائے جان والے کیمیائی مادے کینسر تے ہارمونز وچ وگاڑ دا کارن بن دے ہین۔
سیانیاں دا آکھنا ہے پئی عام طور تے کڑیاں گیاراں ورھے دی عمر توں شنگھار لئی ایہناں شیواں دی ورتوں شروع کر دیندیاں نیں پر ہن چھ ورھیاں دی عمر دیاں بالڑیاں لئی وی ایہو جہیاں شیواں مارکیٹ وچ لیاندیاں گئیاں ہین جیہڑیاں اوہناں لئی چنگیاں نہیں ہین۔ سیانیاں دا آکھنا ہے پئی بالڑیاں دیہاڑی وچ 17 وکھو وکھ شیواں ورتدیاں ہین جدوں کہ وڈی عمر دیاں زنانیاں 13 شیواں دی ورتوں کردیاں ہین۔ شنگھار لئی ورتیاں جان والیاں ایہناں شیواں دی پرکھ مگروں سٹہ ایہہ نکلیا ہے پئی ایہہ بالڑیاں لئی بڑیاں نقصان دین والیاں ہین۔
Bookmarks