Muhabbat zaat hoti hai
Muhabbat zaat hoti hai
Muhabbat zaat ki takmeel hoti hai
Koi jungle mein ja thehrey, kisi basti mein bas jaye
Muhabbat sath hoti hai
Muhabbat khushbu'on ki lay
Muhabbat mausamon ka dhan
Muhabbat abshaaron ke nikhartey paniyon ka mann
Muhabbat jungalon mein raqs karti morni ka tan
Muhabbat barf parti sardiyon mein dhoop banti hai
Muhabbat garm sehraon mein thandi chaon ki manind
Muhabbat ajnabi duniya mein apney gaon ki manind
Muhabbat dil
Muhabbat jaan
Muhabbat rooh ka darmaan
Muhabbat moorti hai
Fiza'on mein kisi ke hath se gar choot jaye to!
Muhabbat aabla hai karb ka!
Aur phoot jaye to!
Muhabbat rog hoti hai!
Muhabbat sog hoti hai
Muhabbat shaam hoti hai
Muhabbat raat hoti hai
Muhabbat jhilmilati raat mein barsaat hoti hai
Muhabbat jeet hoti hai
Muhabbat maat hoti hai
Muhabbat zaat hoti hai!