حادثے کیا کیا تمہاری بے رخی سے ہوگئے
ساری دنیا کے لئے ہم اجنبی سے ہوگئے
کچھ تمہرے گیسوؤں کی برہمی سے ہوگئے
کچھ اندھیرے میرے گھر میں روشنی سے ہوگئے
بندہ پرور کھل گیا ہے آستانوں کا بھرم
آشنا کچھ لوگ راز بندگی سے ہوگئے
گردش دوراں زمانے کی نظر آنکھوں کی نیند
کتنے دشمن ایک رسم دوستی سے ہوگئے
زندگی آگاہ تھی صیاد کی تدبیر سے
ہم اسیر دام گل اپنی خوشی سے ہوگئے
اب کہاں اے دوست چشم منتظر کی آبرو
اب تو ان کے عہد و پیماں ہر کسی سے ہوگئے
Bookmarks