na jaao haal-e-dil-e-zaar dekhte jaao
ki jii na chaahe to naachaar dekhte jaao
bahaar-e-umr mein baagh-e-jahaan kii sair karo
khilaa huaa hai ye gulzaar dekhte jaao
uthao aankh na sharmaao ye to mahfil hai
ghazab se jaanib-e-aghayaar dekhte jaao
huaa hai kyaa abhii hangaamaa abhii kuchh hogaa
fugaan mein hashr ke aasaar dekhte jaao
tumhaarii aankh mere dil se besabab-bevajah
huii hai ladne ko tayyaar dekhte jaao
na jaao band kiye aankh raharavaan-e-adam
idhar-udhar bhii khabaradaar dekhte jaao
koii na koii har ik sher mein hai baat zaruur
janaab-e-"Daag" ke ashaar dekhate jaao
Bookmarks