برطانیہ:خفیہ ادارے کا کوڈ حل کرنےکا مقابلہ
یہ مقابلہ رواں سال تین نومبر کو شروع ہوا اور بارہ دسمبر تک جاری رہے گا
برطانوی خفیہ ادارے ’جی سی ایچ کیو‘ نے باصلاحیت افراد کو اپنی جانب راغب کرنے کے لیے انٹرنیٹ اور سماجی روابط کی ویب سائٹ پر مہم شروع کی ہے۔
اس مہم کے تحت ایک خفیہ کوڈ حل کرنے کے مقابلے کا انتظام کیا ہے۔
متعلقہ عنوانات
سائنس , ٹیکنالوجی
اس مقابلے میں دلچسپی رکھنے والے افراد ایک ویب سائٹ پر جا کر ایک تصویری کوڈ حل کرنے کی کوشش کر سکتے ہیں۔ اس ویب سائٹ کے علاوہ یہ کوڈ سماجی رابطے کی ویب سائٹوں پر مہیا کیا گیا ہے۔
خفیہ ادارے کے ایک ترجمان نے بتایا کہ اس مقابلے کا مقصد جی سی ایچ کیو سے ان افراد کی واقفیت کرانا ہے جن تک دوسرے ذرائع سے پہنچنا مشکل ثابت ہو سکتا ہے۔
ان کا کہنا تھا ’جن لوگوں تک ہم پہنچنا چاہ رہے ہیں ان کو اپنی جانب راغب کرنے کے لیے عام حالات میں استعمال کیے جانے والے اشتہارات کامیاب نہیں ہو سکتے‘۔
انھوں نے مزید کہا ’ہو سکتا ہے کہ یہ افراد بہت ہنرمند ہوں لیکن انھیں یہ ہنر کام کاج کے ماحول میں استعمال میں لانا نہ آتا ہو‘۔
یہ مقابلہ رواں سال تین نومبر کو شروع کیا گیا اور بارہ دسمبر تک جاری رہے گا۔
جی سی ایچ کیو نے بتایا کہ کوڈ توڑنے کی صورت میں صارفین کو ادارے کی ویب سائٹ پر منتقل کر دیا جائے گا۔
واضح رہے کہ اس مقابلے میں صرف برطانوی شہری شرکت کر سکتے ہیں۔
Bookmarks