انسانی اڑان کی مشین کی رونمائی
source: bbc
امریکہ میں انسان کی اڑان کے لیے ایک نئی مشین کو منظر عام پر لایا گیا ہے۔
جس کے ذریعے ہوا میں گلائڈنگ کرتے ہوئے سفر کرکے سڑکوں پر ٹریفک سے نجات حاصل ہو سکے گی۔
مارٹن جیٹ پیک نامی یہ مشین ایک عمومی حجم والے پائلٹ کو تیس منٹ میں تیس میل کے لیے پرواز فراہم کر سکے گی۔ اس اڑان کے لیے مشین کے ساتھ تقریبا انیس لیٹر پیٹرول کا ٹینک نصب کیا گیا ہے۔
اس مشین کی رونمائی ویسکونسن کے ایک سالانہ تجرباتی ہوابازی کی تقریب ’دی اینول ایوی ایشن کنوینشن آف ایکسپیریمینٹل ائیر کرافٹ‘ کے موقع پر کی گئی۔ اس مشین کی کل لاگت تقریباً ایک لاکھ امریکی ڈالر ہے۔
اس مشین کے ساتھ حفاظتی اقدامات کے طور پر ایک ایمرجنسی پیراشوٹ اور ناہموار سطحوں پر لینڈنگ کو ہموار بنانے والے آلات لگائے گئے ہیں۔
اس مشین کے موجد گلین مارٹن نے اس مشین کو اڑانے کا عملی مظاہرہ اپنے بیٹے سے اڑان کروا کر کیا۔
مسٹر مارٹن کا کہنا تھا کہ’ یہ تجربہ ہماری توقعات سے بڑھ کر کامیاب رہا اور لوگ اس کو ایک تاریخی لمحہ طور پر یاد رکھیں گے۔‘
تاہم امریکی ہوا بازی کے قوانین نے اس طرح کی مشینوں کی محدود پیمانے پر استعمال کی اجازت دی ہے۔
اگرچہ اس طرح کی مشینوں کے استعمال کے لیے پائلٹ کو لائسنس کی ضرورت نہیں تاہم زیادہ آبادی والے علاقوں پر اس کو اڑان کی اجازت نہیں۔
فیڈرل ایوی ایشن اتھارٹی کا کہنا ہے کہ اس مشین کو صرف ’ کھیلوں اور تفریحی مقاصد کے لیے استعمال کیا جا سکتا ہے۔‘
Reply With Quote
Bookmarks