Taaj Mahal
taaj tere liye ik mazahar-e-ulfat hii sahii
tum ko is vaadii-e-rangin se aqiidat hii sahii
mere mahabub kahin aur milaa kar mujh se!
bazm-e-shaahii men Gariibon kaa guzar kyaa maanii
sabt jis raah pe hon satavat-e-shaahii ke nishaan
us pe ulfat bharii ruuhon kaa safar kyaa maanii
merii mahabuub pas-e-pardaa-e-tashhiir-e-vafaa
tuu ne satavat ke nishaanon ko to dekhaa hotaa
murdaa shaahon ke maqaair se bahalevaalii
apane taariik makaanon ko to dekhaa hotaa
anaginat logon ne duniyaa men muhabbat kii hai
kaun kahataa hai ki saadiq na the jazbe un ke
lekin un ke liye tashhiir kaa saamaan nahin
kyun ke vo log bhii apanii hii tarah mufalis the
ye imaaraat-o-maqaabir ye fasiilen, ye hisaar
mutal-qulhukm shahanashaahon kii azamat ke sutun
daaman-e-dahar pe us rang kii gulakaarii hai
jis me.n shaamil hai tere aur mere ajadaad kaa Khun
merii mahabuub! unhen bhii to muhabbat hogi
jinakii sannaa_ii ne baKhshii hai ise shakl-e-jamiil
un ke pyaaron ke maqaabir rahe benaam-o-namuud
aaj tak un pe jalaa_ii na kisii ne qandiil
ye chamanazaar ye jamunaa kaa kinaaraa ye mahal
ye munaqqash dar-o-diivaar, ye maharaab ye taaq
ik shahanashaah ne daulat kaa sahaaraa le kar
ham Garibon kii muhabbat kaa udaayaa hai mazaak
mere mahabub kahin aur milaa kar mujh se!
By Sahir Ludhianvi
Reply With Quote
Bookmarks