Ye Surmageen si Ghazaal AANKHEN,
Kamal-e-Qudrat Pe Daal AANKHEN.
Uthen to Badr-e-Atam ki Manind,
Jhuken to Misl-e-Hilal AANKHEN.
Jo Loot lete hain ik Nazar main,
Na unki Ankhon main Daal AANKHEN.
Inhi se Dunya-e-Rang Haseen he,
Qiwam-e-Husn-o-Jamaal AANKHEN.
Saleeb-e-Ulfat pe Zabha ker ke,
Utaar leti hain Khaal AANKHEN.
Inhen bhi Jalwon se koi Hissa,
Hain kab se Mehw-e-Sawal AANKHEN.
He Deed-e-Mehboob in ka sab kuch,
Na Qeel janen na Qaal AANKHEN.
Jamaal ji bhar ke Dekhne ki,
Kahan se laen majaal AANKHEN.
Arab ke sehra pe kiun Tarapta,
Na Dekhta gar Bilal AANKHEN.
Libas-e-Harf-o-Kalim se Aari,
Mager Sunati hain Haal AANKHEN.
Na jaane kis Laal ki Kasak main,
ANAS ki rehti hain Laal AANKHEN.
Bookmarks