جاوید میانداد ڈائریکٹر جنرل پاکستان کرکٹ بورڈ مقرر
اسلام آباد(اوصاف سپورٹس)پاکستان کرکٹ بورڈ کے چیئرمین سابق ٹیسٹ کرکٹر اعجاز بٹ نے سابق کپتان اور ٹیم کے سابق کوچ جاوید میانداد کو فوری طور پر بورڈ کا ڈائریکٹر جنرل مقرر کردیا ہے، جاوید میانداد کو سلیم الطاف کی جگہ یہ عہدہ دیا گیا ہے جنہیں چند روز قبل اس عہدے پر تعینات کیا گیا تھا، جاوید میانداد کے ڈائریکٹر جنرل بننے کے بعد سلیم الطاف کو چیف آپریٹنگ آفیسر مقرر کردیا گیا ہے، یہاں یہ بات دلچسپی سے خالی نہیں کہ چیف آپریٹنگ آفیسر کا عہدہ اس وقت ختم کردیا گیا تھا جب سلیم الطاف کو ڈائریکٹر جنرل مقرر کیا گیا تھا۔جاوید میانداد جنہیں جیف لاسن کو کوچ کے عہدے سے ہٹائے جانے کے بعد یہ کہا جا رہا تھا کہ انہیں چوتھی بار ٹیم کا کوچ مقرر کردیا جائے گا تاہم جاوید میاندادنے ٹیم کا کوچ بننے سے معذرت کرلی تھی جس پر بورڈ کے چیئرمین اعجاز بٹ نے کہا تھا کہ ٹیم کے کوچ کیلئے جاوید میانداد ہماری پہلی ترجیح تھے مگر ان کے انکار کے بعد یہ عہدہ انتخاب عالم کو دیدیا گیا ہے، جاوید میانداد نے یہ بھی کہا تھا کہ وہ کوچ بننے کی بجائے بورڈ میں کسی ایڈوائزری پوزیشن پر کام کرنا پسند کرینگے، سابق ٹیسٹ کرکٹ اعجاز بٹ کے چیئرمین کرکٹ بورڈ بننے کے بعد سے بورڈ میں مختلف عہدوں پر تبدیلیاں کی جا رہی ہیں، اعجاز بٹ نے سلیکشن کمیٹی میں سابق ٹیسٹ کرکٹر اعجاز احمد اور شعیب محمد کو رکھا جبکہ سابق ٹیسٹ فاسٹ بائولر وسیم جعفر چیف سلیکٹر بنائے گئے، ٹیم کے منیجر طلعت علی جو اکتوبر 2006ء کے بعد سے مسلسل اس عہدے پر تعینات تھے کے مستعفی ہونے کے بعد یاور سعید کو یہ عہدہ دیدیا گیا، اعجاز بٹ نے سابق چیف سلیکٹر اور سابق ٹیسٹ اوپنر عامر سہیل کو نیشنل کرکٹ اکیڈمی کا ڈائریکٹر مقرر کیا ان سے قبل اس عہدے پر مدثر نذر تعینات تھے جو استعفی دیکر ابوظہبی چلے گئے ہیں، سابق چیف سلیکٹر و وکٹ کیپر وسیم باری کو اعجاز بٹ نے ڈائریکٹر ہیومس ریسورس مقرر کیا۔ڈائریکٹر جنرل پاکستان کرکٹ بورڈ کے عہدے پر فائز ہونے کے بعد جاوید میانداد نے ایک نجی ٹی وی چینل سے گفتگو کرتے ہوئے کہا کہ انہیں خوشی ہے کہ انہیں ڈائریکٹر جنرل پاکستان کرکٹ بورڈ مقرر کیا گیا ہے اور اب ان کی کوشش ہو گی کہ وہ اس عہدے پر بہترین انداز سے کام کریں، انہوں نے کہا کہ ان کا ہدف ٹیم کے کھوئے ہوئے مقام کو واپس دلانا ہے اور ان کی کوشش ہو گی کہ پاکستان کی ٹیم ایک بار پھر عالمی سطح پر بہترین کارکردگی کا مظاہرہ کرتے ہوئے کامیابیوں کے سفر پر گامزن ہوسکے۔جاوید میانداد نے کہا کہ اعجاز بٹ کے چیئرمین کرکٹ بورڈ مقرر ہونے سے یہ توقع ہو گئی ہے کہ ملک میں اس کھیل کو فروغ حاصل ہوگا کیونکہ اعجاز بٹ خود سابق کرکٹر ہیں لہٰذا وہ کرکٹ کے مسائل کو بہتر انداز سے سمجھتے ہیں۔انہوں نے کہا کہ سابق ٹیسٹ کرکٹر اور کرکٹ کے حلقوں کا ایک طویل عرصے سے یہ مطالبہ تھا کہ کرکٹ کے معاملات سابق ٹیسٹ کرکٹر کو دیئے جائیں تاکہ بہتری آسکے۔
Bookmarks