اسرائیلی فٹبال ٹیم پہ حملہ
ویانا: صیہونی فوج کی جانب سے نہتے فلسطینیوں کو بربریت کا نشانہ بنانے کے خلاف آسٹریا میں ایک گروپ نے اسرائیلی فٹبال ٹیم کے کھلاڑیوں پر حملہ کردیا۔
غیر ملکی خبررساں ادارے کے مطابق آسٹریا کے شہر بسچوف شوفن میں اسرائیلی فٹبال کلب مکابی حیفہ کا فرانس کے فٹبال کلب لیلے کے ساتھ ایک دوستانہ میچ کے دوران غزہ پر جارحیت کے خلاف مظاہرہ کرنے والے نوجوانوں کے گروپ نے اسرائیلی کھلاڑیوں پر حملہ کردیا جس کے باعث منتظمین کو میچ مقررہ وقت سے پہلے ہی ختم کرنا پڑا۔
پولیس کے مطابق جمعرات کو 20 کے قریب نوجوان غزہ پر اسرائیلی جارحیت کی مذمت کرتے نعروں سے بھرے پلے کارڈز کے ہمراہ گراؤنڈ پہنچے اور انہوں نے اسرائیلی کھلاڑیوں پر حملہ کردیا۔ حملے کے فوری بعد پولیس کی بھاری نفری نے موقع پر پہنچ کر حالات پر بروقت قابو پالیا جس کے باعث کسی کھلاڑی کو زیادہ چوٹیں نہیں آئیں۔
واضح رہے کہ صیہونی افواج کی جانب سے گزشتہ 22 روز سے زائد دنوں سے جاری بمباری کے نتیجے میں اب تک شہید ہونے والے فلسطینیوں کی تعداد 1200 سے تجاوز کر چکی ہے جن میں زیادہ تعداد بچوں اور خواتین کی ہے جب کہ سیکڑوں کی تعداد میں زخمی فلسطینی مختلف اسپتالوں میں زیرعلاج ہیں جن پر بھی سفاک صیہوبی فوجی بمباری کرنے سے باز نہیں آتے۔
Reply With Quote
Bookmarks