حسن ظن : خدائے پاک سے اچھی امیدیں وابستہ رکھ&#

**ahadi958** · 18th February 2016, 10:57 AM

حضرت واثلہ رضی اللہ عنہ کہتے ہیں کہ میں نے رسول اللہ
ﷺ
کو یہ فرماتے ہوئے سنا کہ اللہ تعالیٰ فرماتے ہیں میں بندوں کے گما ن اور امید جیسامعاملہ کرتاہوں ۔
حضرت جابر رضی اللہ عنہ سے مروی ہے کہ آپ
ﷺ
نے فرمایا تم میں سے کوئی نہ مرے مگر اس حال میں کہ خدائے پاک عزوجل کے ساتھ اس کا گمان اچھا ہو ۔
حضرت ابوہریرہ رضی اللہ عنہ سے مروی ہے کہ آپ
ﷺ
نے فرمایا کہ اللہ پاک جل شانہ فرماتے ہیں کہ میں بندے کے گمان کے موافق فیصلہ کرتا ہوں۔
(ترمذی ص64،مسلم ، بیہقی ص8)
فائدہ :مطلب یہ ہےکہ عمل کرتے ہوئے اس کی گرفت سے ڈرتا رہے ۔طاعت وعبادت کے عدم قبولیت سے ڈرتا رہے۔بلاعمل کے امید نافع نہیں بلکہ موہوم ہے۔چنانچہ آپ
ﷺ
کا فرمان حسن ظن ، حسن عبادت کے ساتھ ہے۔ابن ابی الدنیا نے بیان کیا ہے کہ بلاعمل کے امید پر بھروسہ کئے رہنا خدا پر جرأت ہے ۔
(بیہقی ج2ص10)
حضرت ابوہریرہ رضی اللہ عنہ سے مروی ہے کہ آپ
ﷺ
نے فرمایا اے لوگو! رب العٰلمین کے ساتھ بہتر گمان رکھو ۔خدائے پاک اپنے بندے کے گمان کے ساتھ ہے۔
(بیہقی ص8)
حضرت انس رضی اللہ عنہ سے مروی ہے کہ آپ
ﷺ
نے فرمایا جس مومن کے دل میں خوف اور امیدجمع ہو جائے ۔ خدائے پاک اس کی امیدوں کو پورا کرتے ہیں اور اسے خوف سے مامون کردیتے ہیں ۔
(شعب الایمان)
فائدہ : نہ محض خوف ہی کرتا رہے کہ اللہ ہمیں معاف نہیں کرےگا ۔ اور نہ امید ہی پربھروسہ کئے رہے کہ عمل سے ڈھیلا پڑ جائے ۔ چنانچہ ابو عثمانی مغربی نے کہا کہ جو اپنے نفس کو محض امیدوں پر رکھے تعطل میں پڑ جائے گا ۔اور جو اپنے نفس کو خوف پر ہی رکھے گا مایوس رحمت ہو جائے گا ۔
(الشعب ج2ص22)
محدث بیہقی رحمتہ اللہ علیہ نے سری رحمتہ اللہ علیہ کا قو ل نقل کیا ہے کہ خوف امید سے افضل ہے ۔ جب تک آدمی صحت مند رہے۔اور جب موت کے آثار طاری ہو جائیں تو امید افضل ہے خوف سے ۔
(بیہقی فی اشعب ج 2 ص7)
مطلب یہ ہے کہ صحت کی حالت میں خوف و خشیت بہتر ہے تاکہ اعمال صالحہ کا صدورہو ۔اور جب عمل کا وقت نہ رہے تو امید اور رضا بہتر ہے ۔امام بیہقی ؒ فرماتے ہیں کہ خوف کا مفہوم یہ ہے کہ خدا کی معصیت سے اپنے آپ کو روک دے اور اپنے آپ کو عبادت وطاعت پر ابھارے۔ یہاں تک کہ جب موت کا وقت آجائے تو خدا کی رحمت سے امید زیادہ وابستہ ہو جائے اور اس کے کرم وفضل پر زیا دہ دل متوجہ ہو جائے اللہ کے وعدہ پر بھروسہ کرتے ہوئے ۔امام نووی ؒنے" ریاض الصالحین " میں بیان کیا ہے کہ حالت صحت میں خو ف امید دونوں برابر ہوں اور مرض کی حالت میں صرف امید اور حسن ظن ہو۔
(دلیل ج 2ص364)
حضرت لقمان نے اپنے بیٹے سے کہا اے میرے بیٹےخدا سے امید تمہیں معصیت پر برانگیختہ نہ کردے ۔ اللہ پاک سے ایساخوف کر و کہ وہ تمہیں رحمت سے مایوس نہ کردے ۔
(بیہقی فی اشعب ج 2ص18)
امام بیہقی رحمتہ اللہ علیہ نے بیان کیا ہے کہ خدا سے ایسا خوف نہ کرتا رہے کہ وہ اس کے کرم سے ناامید کردے ۔جیسا کہ ایسی امید ورجا ء نہ ہو کہ خدا کی گرفت سے مامون ہو جائے اور گناہ پر دلیر ہو جائے۔
حضرت ابوہریرہ رضی اللہ عنہ سے مروی ہے کہ آپ
ﷺ
نے فرمایا ۔ اللہ نے اپنے ایک بندے کو جہنم کا حکم دیا۔چنانچہ جب وہ جہنم کے قریب کھڑا ہوا تو کہا اے اللہ آپ کے متعلق میرا گمان بڑا اچھا تھا ( کہ آپ مغفرت فرمادیں گے) تو اللہ پاک نے کہا اسے لوٹاؤ میں اپنے بندے کے گمان کے ساتھ ہوں۔
((بیہقی فی اشعب ص9)
ماخوذ از : شمائل کبریٰ ، جلد 1 حصہ سوم صفحہ 236
تالیف:مولانا مفتی محمد ارشاد قاسمی مدظلہ العالی