وزیر خارجہ شاہ محمود قریشی نے کہا ہے کہ فرینڈز آف پاکستان نے پاکستان کو5.28ارب ڈالر دینے کا وعدہ کیا ہے۔ جیو نیوز سے گفتگو کرتے ہوئے انہوں نے ان تمام ممالک کا شکریہ اداکیا جنہوں نے اس سلسلے میں تعاون کیا۔وزیر خارجہ نے کانفرنس کے اہتمام پر جاپان کا شکریہ ادا کیا۔ انہوں نے کہا کہ کانفرنس کے موقع پر ایران کے وزیر خارجہ نے ایران پاکستان گیس پائپ لائن شروع کرنے کا اعلان کیا ، اسکے علاوہ330ملین ڈالر کی امداد کا وعدہ کیا،جس سے ہمارے ملک میں جاری توانائی کے بحران پر قابو پانے میں مدد ملیگی۔ وزیر خارجہ نے کہا کہ یہ تمام امداد قطعی غیر مشروط ہے۔ ایک سوال کے جواب میں انہوں نے کہا کہ یہ امداد فوری ملنا شروع ہو گی اور دو سال کے اندر تمام امداد مل جائیگی۔ اگلی کانفرنس کی تاریخوں کے حوالے انہوں نے کہا کہ ترکی کے وزیر خارجہ کی مشاورت سے ان تاریخوں کا اعلان کیا جائیگا۔وزیر خارجہ نے کہا کہ پاکستان نے دہشت گردی کے خلاف جنگ میں جانی و مالی نقصان اٹھایا ، اس حوالے سے بنائی جانے والی دستاویزی فلم نے زبردست تاثر پیدا کیا۔
Bookmarks