کھانے کے برتن
کھانے کے برتنوں کے بارے میں اہل جرمنی کا ایک مقولہ ہے کہ اچھے کھانے کا آدھا مزہ اس کے ذائقہ میں ہوتا ہے اور آدھا برتنوں کی خوبصورتی میں ۔
۱۔ بے قلعی تانبے اور پیتل کے برتنوں میں ہر گز کھانا نہ کھایئے ان سے جذام پیدا ہونے کا خدشہ ہوتا ہے اگر قلعی کرا کے استعمال کیا جائے تو پھر مضرت زائل ہو جاتی ہے ۔
۲۔ کھانا پکانے کے دوران تانبے یا پیتل کے برتنوں میں لیموں، سرکہ، یا کھٹائی ہر گز نہ ڈالیں کیونکہ اس سے برتنوں کا میل چھوٹ کر برتنوں میں شامل ہو جاتا ہے اور اس کے زہر سے بد ہضمی، اسہال اور قے کا اندیشہ ہے ۔
۳۔ ایلومینیم کے برتنوں میں بھی کھانا پکانا درست نہیں کیونکہ آدمی کینسر جیسے موذی جیسے مرض میں مبتلا ہو سکتا ہے ۔
۴۔ مٹی کے برتن میں صرف ایک ہی بار کھانا پکایئے ۔
۵۔ مسام دور اور کھوکھلے پتھر کے برتنوں میں پانچ دفعہ سے زیادہ کھانا نہ پکایئے ۔
۶۔ لوہے کے برتن میں کھانا پکانا بڑا مفید ہے بشرطیکہ وہ زنگ آلود نہ ہو ۔
۷۔ ایلومینم کے برتنوں سے صرف پانی گرم کرنے کا کام لیں ۔
۸۔ ناکارہ درختوں کی لکڑی سے بھی کھانا پکائیں ۔
۹۔ کھانا نکالنے کے بعد اسے ایسے سر پوش سے ڈھانپیئے جو سوراخ دار ہو کیونکہ ایسا نہ کرنے سے کھانے میں بدبو پیدا ہو سکتی ہے ۔
۱۰۔ جن برتنوں میں کھانا نکال کر کھائیں وہ شیشے چینی یا مٹی کے ہوں تو بہتر ہے ۔
برتنوں کی صفائی
چاندی کے برتن ۔
پہلے گرم پانی میں ڈال کر دھوئیں خشک ہونے پر صرف چونے کا لیپ کر کے پھر خشک کر لیں ازاں بعد فلا لین کے کپڑے سے پونچھ لیں بیل بوٹے والے برتنوں کے لئے برش استعمال کریں آلو کے پانی میں تھوڑا سا سوڈا یا نوشادر ڈال کر رکھ کر کچھ دیر تک یہ پانی برتنوں پر لگا کر رکھ دیں اور پھر کپڑے سے رگڑ کر برتن پونچھ لینے سے بھی چاندی کے برتن صاف ہو جائیں گے ۔
جرمن سلور
باریک ریت اور راکھ سے صاف کریں دھبے پڑے ہوں تو لیموں کے چھلکوں سے صاف کریں ۔
تانبے کے برتن
آدھ سیر پانی اور ایک چمچہ کپڑے دھونے والا سوڈا کر خوب ابال لیں اور پھر دھوئیں ۔
جست کے برتن
سرکے میں کپڑے دھونے کا سوڈا اور چونا ملا کر صاف کریں ۔
لوہے کے برتن
راکھ اور ریت سے صاف کریں
چینی کے برتن
چینی کے برتن گرم پانی میں ڈالیں اور پھر پانی ہی میں ٹھنڈا ہونے دیں اور بعد ازاں صاف کر لیں ۔
کانچ کے برتن۔
نمک سے صاف کریں یا آلو کے صاف گول ٹکڑے کاٹ کر گرم پانی میں ڈال دیں اس پانی میں کپڑے تر کر کے برتنوں کو رگڑیں صاف کرنے کے بعد سرکے کے پانی یا لیموں کے عرق سے ایک بار دھو ڈالیں تو ان میں چمک پیدا ہو جائے گی ۔
ایلومینم کے برتن
ایک ملائم کپڑے کے ٹکڑوں کو لیموں کے رس میں بھگو کر صاف کریں پھر گرم پانی سے دھو ڈالیں بعض لوگ بیسن سے بھی ایلومینیم کے برتنوں کو صاف کرتے ہیں ۔
پتھر کے برتن
کھریا اور سجی کو پانی میں حل کر کے کپڑے سے پتھر کے برتنوں کو رگڑیں اور پھر پانی میں دھو کر کھدر کے کپڑے سے پونچھ لیں ۔
مٹی کے برتن
چکنائی والے برتنوں کے محلول سے صاف کریں ۔
برتنوں پر قلعی کرنا
رانگا اور نوشادر لے کر آدھ سیر پانی ڈال کر آگ پر رکھ دیں جب سارا پانی بھاپ بن کر اڑ جائے تب اسے نکال کر باریک پیش لیں اورضرورت پڑنے پر برتن کو کوئلے کی جلتی ہوئی آگ پر رکھیں جب برتن گرم ہو جائے تو کسی اوزار سے پکڑ کر قلعی کا ٹکڑا برتن کی کئی جگہوں پر تھوڑا تھوڑا رگڑیں اس کے بعد روئی لے کر نوشادر ملیں برتن قلعی ہو جائے گا ۔
ہاتھی دانت کی مصنوعات کی صفائی
اگر دانت کی کوئی چیز زرد پڑ جائے تو اسے شیشے کے جار میں رکھ کر سورج کی کرنوں کے سامنے رکھ دیں چیز صاف ہو جائے گی ۔
Bookmarks