`*`*`* Roman Choice `*`*`*`

[Shaheen]

terii hii tarah hamein yaad aane vaalaa ho
tere sivaa bhii ko_ii to sataane vaalaa ho

har ek subah yahii dil mein huuk uThatii hai
hamen bhii naaz se ko_ii jagane vaalaa ho

vo kis ummiid mein ghar mein rahein ki jis ghar mein
na aane vaalaa ho ko_ii na jaane vaalaa ho

har ek se nazaren milaa_ii hain un ke kuuche mein
ki jaise ab ko_ii ham ko bulaane vaalaa ho

hai dosto ke liye aa_iinaa nazar merii
nazar milaaye jo nazarein milaane vaalaa ho

ki jaise ko_ii balaa mujhape aane vaalii hai
haraas kahataa hai ko_ii bachaane vaalaa ho

[haraas=fear]

hamaare shahar mein kyaa kyaa saje-sajaaye hain ghar
hamaare ghar ko bhii koii sajaane vaala ho

[Shaheen]

terii Khushbuu kaa pataa kartii hai
mujh pe ehasaan havaa kartii hai

shab kii tanhaa_ii me.n ab to aksar
guftaguu tujh se rahaa kartii hai

dil ko us raah pe chalnaa hii nahii.n
jo mujhe tujh se judaa kartii hai

zindagii merii thii lekin ab to
tere kahane me.n rahaa kartii hai

us ne dekhaa hii nahii.n varnaa ye aa.Nkh
dil kaa ehavaal kahaa kartii hai

beniyaaz-e-kaaf-e-dariyaa angusht
ret par naam likhaa kartii hai

shaam parte hii kisii shaKhs kii yaad
koochaa-e-jaaN mein sadaa kartii hai

mujh se bhii us kaa hai vaisaa hii suluuk
haal jo teraa ana??? kartii hai

dukh huaa karataa hai kuchh aur bayaa.N
baat kuchh aur huaa kartii hai

abr barase to inaayat us kii
shaaKh to sirf duaa kartii hai

masalaa jab bhii uThaa chiraaGo.n kaa
faisalaa sirf havaa kartii hai

[Shaheen]

terii taariif karate hai.n to isame.n kyaa buraii hai
Khudaa ne apne haatho.n se terii suurat banaii hai

hazaaro.n kii tarah sun le terii rusavaaii ke Dar se
teri tasviir hamne kitaabo.n me.n chhupaaii hai

terii maasuum suurat kii yahii taariif hai sun le
zabaa.N pe hai yahii sab ke Khudaaii hai Khudaaii hai

marz ye ishq kaa aisaa lagaa ki phir nahii.n chhuuTaa
duaa bhii hamane kii "Rahi" davaa bhii aazamaaii hai

[Shaheen]

terii talaash me.n ham jab kabhii nikalte hai.n
ik ajanabii kii tarah raaste badalte hai.n

daraaz ho Gam-e-hijraa.N ki haasil-e-hijraa.N
vo hausale.n hai.n jo aaGosh-e-Gam me.n palte hai.n

ravaa nahii.n hai Gam-e-ishq is qadar bhii Garuur
tere baGair bhii duniyaa ke kaam chalte hai.n


kabhii jo had se ba.Dhii un kii yaad to samajhe
ki un ke dil me.n bhii kuchh val_vale machalte hai.n

shab-e-firaaq kuchh aisii bhii tiiragii to nahii.n
kabhii kabhii sar-e-mizgaa.N charaaG jalte hai.n

ab un ke Gam se bhii maharuum ho na jaaye.n kabhii
vo jaanate hai.n ki is Gam se dil bahalte hai.n

[Shaheen]

hans ke bolaa karo bulaayaa karo
aap kaa ghar hai aayaa jaayaa karo

muskurahaT hai husn kaa zevar
ruup barhataa hai muskuraayaa karo

had se barh kar hasiin lagate ho
jhuuThii qasmen zaruur khaayaa karo

hukm karanaa bhii ek saKhaavat hai
ham ko Khidamat ko_ii bataayaa karo

baat karanaa bhii baadashaahat hai
baat karanaa na bhuul jaayaa karo

taa ke duniya kii dil_kashii na ghaTe
nit naye pairahan mein aayaa karo

kitane saadaa mizaaj ho tum 'Adam'
us galii mein bahut na jaayaa karo

[Shaheen]

zaalim thaa vo aur zulm kii aadat bhii bahut thii
majabuur the ham us se muhabbat bhii bahut thii

us but ke sitam sah ke dikhaa hii diyaa ham ne
go apanii tabiyat mein bagaavat bhii bahut thii

vaaqif hii na thaa ramz-e-muhabbat se vo varnaa
dil ke liye thorii sii inaayat bhii bahut thii

yuun hii nahiin mashhuur-e-zamaanaa meraa qaatil
us shaKhs ko is fan mein mahaarat bhii bahut thii

kyaa daur-e-Gazal thaa ke lahuu dil mein bahut thaa
aur dil ko lahuu karane kii fursat bhii bahut thii

har shaam sunaate the hasiinon ko Gazal ham
jab maal bahut thaa to saKhaavat bhii bahut thii

bulavaa ke ham 'Ajiz' ko pashemaan bhii bahut hain
kyaa kiijiye kam_baKht kii shoharat bhii bahut thii

[Shaheen]

zaraa sii baat pe har rasm tor aayaa thaa
dil-e-tabaah ne bhii kyaa mizaaj paayaa thaa

muaaf kar naa sakii merii zindagii mujh ko
vo ek lamhaa ki maiin tujh se tang aayaa thaa

shaguftaa phuul simaT kar kalii bane jaise
kuchh is tarah se tuune badan churaayaa thaa

guzar gayaa hai ko_ii lamhaa-e-sharar kii tarah
abhii to main use pahachaan bhii na paayaa thaa

pataa nahiin ki mere baad un pe kyaa guzarii
main chand Khvaab zamaane mein chhor aayaa tha

[Shaheen]

Nazar andaz kaise kare AAPKO,
Nazare me bithaya hai AAPKO,
AAPKI Yaad Aayegi to Bahenge Aanshu,
Magar hum Royenge bhi Nahi,
kyunki palke chubhengi AAPKO....!

[Shaheen]

duniya ki nazar lag sakti hai khudko bachaya karo.
Aankho main kajol ki nahi , gale main nimbu mirchi bhi lagaya karo.

[Shaheen]

Lafz ki shakl mein ehsas likha jata hai
Ya'ni seerabi ko bhi piyaas likha jata hai
merey jazbaat sey waqif hai qalam bhi mera
mein wafa likhhoon to TERA NAAM likha jata hai

[Shaheen]

kaash mai.n tere hasiin haath kaa kangan hotaa

tuu bare pyaar se bare chaao se bare aramaan ke saath
apanii naazuk sii kalaa_ii mein charhaatii mujh ko
aur betaabii se furqat ke KhizaaN lamhon mein
tuu kisii soch mein Duubii jo ghumaatii mujh ko
main tere haath kii Khushbuu se mahak saa jaataa
jab kabhii mooD mein aa kar mujhe chuumaa kartii
tere honTon kii shiddat se main dahak saa jaataa

raat ko jab bhii tuu niindon ke safar par jaatii
marmarii haath kaa ik takiyaa banaayaa kartii
main tere kaan se lag kar ka_ii baaten kartaa
terii zulfo.n ko tere gaal ko chuumaa kartaa
jab bhii tuu band qabaa kholane lagatii jaanaaN
apanii aaNkhon ko tere husn se kheraa kartaa
mujh ko betaab saa rakhataa terii chaahat kaa nashaa
main terii ruuh ke gulashan mein mahaktaa rahtaa
main tere jism ke aaNgan mein khanaktaa rahtaa
kuchh nahiin to yahii benaam saa bandhan hotaa

kaash main tere hasiin haath kaa kangan hotaa

[Shaheen]

nahiin ke milne milaane kaa sil_silaa rakhnaa
kisii bhii satah pe ko_ii to raabtaa rakhnaa


madad kii tum se tavaqqo to Khair kyaa hogii
Gariib-e-shahar-e-sitam huuN meraa pataa rakhnaa


marenge aur hamaare sivaa bhii tum pe bahut
ye jurm hai to phir is jurm kii sazaa rakhnaa

naye safar pe ravaanaa huaa hai az-sar-e-nau
jab aaooNgaa to meraa naam bhii nayaa rakhnaa


hisaar-e-shauq uThaanaa 'Zafar' zaruur magar
kisii taraf se nikalane kaa raastaa rakhanaa