محبت دی اگ وچ سڑسیں تاں روسیں , غفلت دی نیندر اگھڑسیں تاں روسیں
میڈا مناونڑ تیکوں یاد آسی , جڈاں کہندے پیراں نوں پھڑسیں تاں روسیں
جدنڑ وی ضمیر اے ملامت کریسی , تے حر وانگوں خود نال لڑسیں تاں روسیں
اج تیڈے نال ہاں تے کل کوئ نہ ھوساں , قبر دے سراندی آ کھڑسیں تاں روسیں
ہتھ رکھ جگر تے آہیں بھریسیں , تکبر دے ہتھوں اجڑسیں تاں روسیں
تیکوں وسدے ویلے ولا یاد آسن , سنجے گھر دے ویڑھے وڑسیں تاں روسیں
عجب ہک خیالاں دا ہائ شاعر فانی , میڈی کائ غزل نوں پڑھسیں تاں روسیں
Bookmarks