asar usako zaraa nahii hotaa
ranj raahat fazaa nahii hotaa
tum hamaare kisii tarah na hue
varanaa duniyaa men kyaa nahii hotaa
naarasaaii se dam ruke to ruke
main kisii se Khafaa nahiin hotaa
tum mere paas hote ho goyaa
jab koii duusaraa nahiin hotaa
haal-e-dil yaar ko likhuuN kyon kar
haath dil se judaa nahiin hotaa
kyon sune arz-e-muztarib ae 'Momin'
sanam aaKhir Khudaa nahiin hotaa
royaa karenge aap bhii paharon isii tarah
Momin Khan Momin