میری خاطر نوکری لَبھدا مَر گیا میرا ابّا
انجینئری کر کے ویلے پھردے کَم نئی مِلدا ربّا

ٹی وی، ٹیپ، فریج، فریزر، وی سی آر لیایا
سارے پِنڈ توں اُچّا کوٹھا آ کے اُوس بنایا

مینوں تھاں تے مار مکایا طعنے دے دے یاراں
میرے کول اے ٹُٹیا سائیکل اوہدے کول نیں کاراں

کُج وی اپنے گھر وچ ناہیں شرم چ ڈُبدا جاواں
ایس ڈگری نوں ویکھاں، چَٹّاں، پیواں یا میں کھاواں

رشتے داراں تے یاراں دی سنگت وی چُھٹ جاندی
ویزے والا جے کوئی مل جائے منگنی وی ٹُٹ جاندی

قلم دواتاں توڑاں تے میں سبھی کتاباں پھاڑاں
دل کردا اِس ڈگری نوں میں چُلّھے دے وِچ ساڑاں

شام سویرے لڑے زنانی بھکھے روہن نیانیں
"ڈگری نالوں ویزا چنگا“ کہندے سچ سیانے