آخری رات تھی وہ
میں نے دل سے یہ کہا
حرف جو لکھے گئے
اور جو زباں بولی گئی
سبھی بے کار گئے
میں بھی اب ہار گیا یار بھی سب ہار گئے
کوئی چارہ نہیں جُز ترکِ تعلق اے دل
اک صدا اور سہی آخری بار
جسم سے چھیڑ اسے روح سے چھُو لے اُسے
آخری بار بہے ساز بدن سے کوئی نغمہ کوئی لےَ
آخری رات ہے یہ
آخری بار ہے یہ ذائقہ بوس و لمس
آخری بار چھلک جائے لہو
گرمیِ جاں سے مہک جائے نفس کی خوشبو
خواب میں خواب کی مانند اتر جا اے دل
آخری رات تھی وہ
پھر گُزر کوئے ندامت سے ہوا تو دیکھا
بام روشن ہے جو تھا
اور دروازے پہ دستک ہے وہی
میرا قاتل درو دیوار پر کچھ نقش بناتا ہے ابھی
انگلیاں خون سے تر، دل کم ظرف کو ہے واہمہ عرضِ ہُنر
دن کی ہر بات ہوئی بے توقیر
رات ہے اور ضمیر
چشم ہے منتظرِ خواب دگر
خواب آتے ہیں ٹھہرتے ہیں چلے جاتے ہیں
اور قاتل کی سزا یہ بھی کہ میں زندہ ہوں
عبید اللہ علیم
Bookmarks