Tum aao to $ah!
*******
tum ko ham dil mein basaa leinge tum aao to sahii
saarii duniyaa se chhupaa leinge tum aao to sahii
***
ek vaadaa karo ab ham se na bhichhaDoge kabhii
naaz ham saare uThaa leinge tum aao to sahii
***
bevafaa bhii ho sitamagar bhii jafaa_peshaa bhii
ham Khudaa tum ko banaa leinge tum aao to sahii
***
yuuN to jis simt nazar uThatii hai taariikii hai
pyaar ke diip jalaa leinge tum aao to sahii
***
iKhtalaafaat bhii miT jaayeinge raftaa raftaa
jis tarah hogaa nibhaa leinge tum aao to sahii
***
dil kii viiraanii se ghabaraake na muuNh ko moDo
bazm ye phir se sajaa leinge tum aao to sahii
***
raah taariik hai aur duur hai manzil lekin
dard kii shamaeiN jalaa leinge tum aao to sahii
******
Bookmarks