شعیب ملک نے ایک طویل وقفے کے بعد بڑا سکور کیا
کولمبو میں کھیلے جانے والے تیسرے ٹیسٹ میچ کے تیسرے دن کا کھیل ختم ہونے پر پاکستان نے پانچ وکٹ کے نقصان پر تین سو رن بنا لیے ہیں اور اسے سری لنکا پر تین سو چھیاسٹھ رن کی مجموعی برتری حاصل ہوگئی ہے۔
تیسرے دن کے کھیل کی خاص بات پاکستانی مڈل آرڈر کی عمدہ بیٹنگ تھی۔ پاکستان کی جانب سے شعیب ملک نے سنچری جبکہ کامران اکمل، مصباح الحق نے نصف سنچریاں بنائیں۔
جب کھیل ختم ہوا تو شعیب ملک ایک سو چھ جبکہ کامران اکمل ساٹھ رنز کے ساتھ کریز پر موجود تھے۔ان دونوں بلے بازوں کے درمیان ایک سو چودہ رن کی شراکت ہو چکی ہے۔پاکستان کے آؤٹ ہونے والے آخری کھلاڑی مصباح الحق تھے جو پینسٹھ رن بنا کر آؤٹ ہوئے۔ مصباح اور شعیب ملک کے درمیان ایک سو انیس رن کی شراکت ہوئی۔
تیسرے دن جب پاکستان نے سولہ رن ایک کھلاڑی آؤٹ پر اپنی دوسری اننگز دوبارہ شروع کی تو اسے جلد ہی دوسرا نقصان فواد عالم کی وکٹ کی صورت میں اٹھانا پڑا۔ فواد سولہ رن بنا کر تھشارا کی گیند پر آؤٹ ہوئے جبکہ اس وقت پاکستان کا مجموعی سکور بائیس تھا۔
پاکستان کی تیسری وکٹ چوّن کے سکور پر گری جب کپتان یونس خان انیس رن بنا کر کلاسیکیرا کی گیند پر ایل بی ڈبلیو ہوگئے۔ آؤٹ ہونے والے چوتھے کھلاڑی محمد یوسف تھے جنہیں ہیراتھ کی گیند پر سنگاکارا نے کیچ کیا۔ انہوں نے تیئیس رن بنائے۔
مصباح الحق
مصباح الحق نے پر اعتماد بلے بازی کا مظاہرہ کیا
سری لنکا کی جانب سے ہیراتھ نے دو جبکہ کلاسیکیرا اور تھشارا نے ایک، ایک وکٹ حاصل کی ہے۔
پاکستان اور سری لنکا نے تیسرے ٹیسٹ کے لیے ٹیم میں ایک ایک تبدیلی کی ہے۔ پاکستان نے فاسٹ بالر عبدالرؤف کی جگہ سپنر دانش کنیریا کو کھلایا ہے جبکہ سری لنکن فاسٹ بالر چمندا واس کو اجنتھا مینڈس کی جگہ سری لنکن ٹیم میں شامل کیا گیا ہے۔ یہ واس کا آخری ٹیسٹ میچ ہے۔
سری لنکا پہلے ہی تین ٹیسٹ میچوں کی سیریز کے ابتدائی دو ٹیسٹ جیت کر فیصلہ کن برتری حاصل چکا ہے۔
Bookmarks