Aisay chup haiN kay yeh manzil bhi kari ho jesay
Tera milna bhi judaee ki ghari ho jesay
Apnay hi saaye say har gaam laraz jata hooN
Raastay mein koi deewar khari ho jesay
Kitnay naadaaN haiN teray bhoolnay walay kay tujhay
Yaad karnay kay liay umr pari ho jesay
Teray maathay ki shikan pehlay bhi dekhi thi magar
Yeh giraah ab kay meray dil meiN pari ho jesay
ManzileiN duur bhi haiN manzileiN nazdeek bhi haiN
Apnay hi paa'on meiN zanjeer pari ho jesay
Aaj dil khol kay ro'ay haiN tou yooN khush haiN Faraz
Chund lamhoN ki yeh raahat bhi bari ho jesay
Bookmarks