ترانہ اردو
محمد عرفان
ترانہ اردو
سب سے اچھی سب سے میٹھی، سب سے سہانی اردو ہے
جگ میں لاکھوں لاکھ زبانیں، اردو رانی اردو ہے
فقرہ فقرہ اکبرِ اعظم مصرع مصرع نور جہاں
بیجا پور، میسور سے تا کشمیر ہیں جس کے نام و نشاں
لہجہ لہجہ تاج محل ہے، شاہ جہانی اردو ہے
جگ میں لاکھوں لاکھ زبانیں، اردو رانی اردو ہے
اس میں سب پھولوں کی خوشبو، سب پھولوں کی رنگت ہے
سب قدموں کی چاپ ہے اس میں، سب قوموں کی سنگت ہے
ہندستان کی کوکھ سے جنمی، ہندستانی اردو ہے
جگ میں لاکھوں لاکھ زبانیں، اردو رانی اردو ہے
عید کرسمس ہولی دوالی، سب تہوار ہمارے ہیں
آنکھ کی ٹھنڈک دل کی رونق یہ سارے نطّارے ہیں
سچّے پرکھوں کا ورثہ ہے، سچّی بانی اردو ہے
جگ میں لاکھوں لاکھ زبانیں، اردو رانی اردو ہے
صوفی سنتوں اور ولیوں نے اس کا باغ لگایا ہے
خسرو جیسے فنکاروں نے اس کا ساز بجایا ہے
بھکتی کال کے دوہوں والی، پریم دوانی اردو ہے
جگ میں لاکھوں لاکھ زبانیں، اردو رانی اردو ہے
اردو ہے دشمیش کی بولی، اردو امرت دھارا ہے
اردو کا جو لفظ ہے گویا نانک کا گرودوارا ہے
گیان سریتا کہلاتی ہے، بڑی گیانی اردو ہے
جگ میں لاکھوں لاکھ زبانیں، اردو رانی اردو ہے
عشق و وفا کے قومی نغمے اردو گاتی آئی ہے
عشق و وفا کے نام پہ اردو دھوم مچاتی آئی ہے
عشق و وفا جتنے ہیں پرانے اتنی پرانی اردو ہے
جگ میں لاکھوں لاکھ زبانیں، اردو رانی اردو ہے
ملتی ہے اوراقِ غزل میں روز گلابوں کی مانند
بند کھلی آنکھوں میں اردو پیار کے خوابوں کی مانند
ایک حقیقت ایک فسانہ ایک کہانی اردو ہے
جگ میں لاکھوں لاکھ زبانیں، اردو رانی اردو ہے
اردو اک تحفہ ہے نرالا اردو اک گلدستہ ہے
اردو ہے تہذیب کی منزل اردو سچّا رستہ ہے
سب کے من کو جیت چکی ہے وہ من مانی اردو ہے
جگ میں لاکھوں لاکھ زبانیں، اردو رانی اردو ہے
آجائے جس وقت زباں پر زور دکھا کر رہتی ہے
نفرت سے ٹکرائے تو دیوار گراکر رہتی ہے
ایک تلاطم، ایک سمندر، ایک روانی اردو ہے
جگ میں لاکھوں لاکھ زبانیں، اردو رانی اردو ہے
اردو بھاشا ایک خزانہ آزادی کی بولی کا
اردو نے ہی توڑ کیا تھا انگریزوں کی گولی کا
آزادی کی لڑائی لڑی ہے، وہ مردانی اردو ہے
جگ میں لاکھوں لاکھ زبانیں، اردو رانی اردو ہے
اردو اپنا جینا مرنا، اردو کھانا پیناہے
اردو اپنی روزی روٹی اردو خون پسینہ ہے
اردو اپنا رزق ہے، اپنا دانہ پانی اردو ہے
جگ میں لاکھوں لاکھ زبانیں، اردو رانی اردو ہے
دنیا والو! اس کو بھلانا، اس کو مٹانا کھیل نہیں
بن اردو کے دل والوں میں کوئی محبت میل نہیں
اردو سب سے پیاری زباں ہے سب کی زبانی اردو ہے
جگ میں لاکھوں لاکھ زبانیں، اردو رانی اردو ہے
Reply With Quote
Bookmarks