【السلام علیکم】
سجنو تے ویرو ،تہاڈے لئی کُج ھور نویاں گلاں لے کے حاضر آں ،تے لو فیر پڑھو تے خوش رہوو
حُسن دے مقابلے تے ہوندے ای رہندے نیں پر تھائی لینڈ دے اک مشہور حُسن دے مقابلے وچ اوہناں زنانیاں نوں ایں رلن دتا جاندا ہے جیہناں دا بھار 2 من توں ودھ ہوندا اے تے جتن والی زنانی نوں 'مس جمبو کوئین' آکھیا جاندا اے۔
حُسن اُکا پتلے تے سوہل ہون دا ناں ای نہیں۔ تھائی لینڈ دے شہر ایوتھایا وچ ہون والے ورھے وار مس جمبو بیوٹی کوئین نے ایہہ گل ثابت کر دتی اے ۔
ایس ورھے ایس مقابلے وچ 31 زنانیاں رلیاں ہوئیاں سن۔ ہر زنانی دا گھٹو گھٹ بھار 80 کلو سی۔
مقابلے توں پہلاں ایہناں زنانیاں نوں اک پکے سٹیج تے سدیا گیا جتھے اوہناں نے اپنی صحت تے سماجی پکھ تے ہون والے سوالاں دے جواب دتے۔ مس جمبو بیوٹی کوئین دے مقابلے دا پربندھ کرن والیاں دا آکھنا اے پئی ایس مقابلے دا مقصد صحت مند حیاتی تے بہتے بھار والیاں زنانیاں دی بھلیائی لئی کماں نوں ودھاؤنا اے۔ مقابلے توں پہلاں ایہناں زنانیاں نوں بھار گھٹاؤن تے شنگھار کرن دے کورس کروائے جان گے۔ جیہڑیاں زنانیاں دا بھار کجھ گھٹ جاوے گا اوہناں نوں مقابلے وچ بہتے نمبر دتے جان گے۔
چنگا فیرہن اجازتاں
ساریاں دا رب راکھا
Bookmarks